MERKEL FUQ QUDDIEM

Il-Konservattivi (CDU) ta’ Angela Merkel jinsabu fil-vantaġġ bi 15-il punt ta’ persentaġġ fuq il-partit tas-Soċjalisti u Demokratiċi (SPD) ta’ Martin Schulz fl-elezzjonijiet ġenerali fil-Ġermanja.

Fl-24 ta’ Settembru l-poplu Ġermaniż se jagħżel il-kanċillier tal-Ġermanja u se jkun qed jagħżel ukoll id-direzzjoni tal-Unjoni Ewropea f’diversi oqsma fosthom ir-riformi taż-żona ewro, il-politika ta’ difiża u dik tal-immigrazzjoni fl-erba’ snin li ġejjin.

Importanti wkoll għall-futur tal-Ewropa l-partiti ż-żgħar li jistgħu jsibu ruħhom fit-tmun tal-pajjiż permezz ta’ koalizzjoni mal-partiti l-kbar. Għalkemm Merkel hija fil-vantaġġ sew u mistennija tikseb ir-raba’ rebħa fl-elezzjoni ġenerali, hi u l-partit tagħha aktarx ikollhom bżonn l-appoġġ ta’ partit jew tnejn biex tiggverna. Is-sitwazzjoni tkun l-istess f’każ li Martin Schulz jirnexxielu jegħleb lil Merkel.

B’kollox mistennija jidħlu sitt partiti fil-Bundestag, fosthom insibu l-partit tax-xellug estrem Die Linke u dak tal-lemin estrem Alternattiva għall-Ġermanja (AfD) – partit ewroxettiku li jista’ jerbaħ is-siġġijiet fil-parlament nazzjonali Ġermaniż għall-ewwel darba.