1.5 MILJUN AKTAR REFUĠJATI GĦALL-ĠERMANJA FL-2016

Wara l-attakki sesswali f’Cologne u bliet oħra Ġermaniżi, l-akbar sfida ta’ Angela Merkel hija dik li tiżgura liċ-ċittadini tagħha li tista’ żżomm l-ordni u s-sigurta` fil-Ġermanja. Il-Gvern Ġermaniż jaħseb li l-attakki tal-ewwel tas-sena setgħu kienu koordinati minn qabel permezz tal-media soċjali. Il-poplu Ġermaniż, magħruf għall-preċiżjoni u l-ordni issa jinsab taħt xokk. Wara l-avvenimenti tal-ewwel tas-sena anqas minn 40% tal-Ġermaniżi jemmnu li l-pulizija jistgħu jiżguraw is-sigurta` tagħhom. 50% ta’ dawk li ħadu sehem fl-istħarriġ jibżgħu li attakk bħal dak ta’ Cologne jista’ jseħħ qrib darhom.

Merkel wiegħdet li tieħu miżuri li jiżguraw li kriminali li mhux ċittadini Ġermaniżi jittiħdilhom id-dritt ta’ residenza. Wiegħdet deportazzjoni ta’ dawk li ma ntlaqgħetilhomx it-talba għall-ażil. Min-naħa l-oħra, il-qrati Ġermaniżi għamluha ċara li l-gvern ma jistax jiddeporta l-barranin f’pajjiżi oħra li fih jistgħu jkunu torturati jew jaffaċċjaw il-piena kapitali. Allura fil-verita` se jibqa’ diffiċli għal Merkel biex tiddeporta l-kriminali.

Merkel għadha qed tirrifjuta li tillimita lill-immigranti li jidħlu pajjiżha u qed isserraħ fuq l-Unjoni Ewropea u t-Turkija biex jgħinuha tnaqqas l-influss ta’ immigranti. F’dawn l-aħħar xhur l-awtoritajiet Ġermaniżi rreġistraw bejn 3, 000 u 4, 000 immigrant ġdid kuljum. Jekk din ir-rata tinżamm, fl-2016 il-Ġermanja se tara 1.5 miljun immigrant ġdid.