100,000,000 EWROPEW B’UĠIGĦ FL-GĦADAM U L-MUSKOLI

Madwar 100 miljun ċittadin Ewropew ibati minn uġigħ fl-għadam jew fil-muskoli. Minn dawn nofshom ma jmorrux xogħol għal tlett ijiem jew aktar. Huwa stmat li l-ispejjeż diretti u indiretti tal-mard fl-għadam u l-muskoli jlaħħaq il-€240 biljun fis-sena jew 2% tal-GDP fl-Unjoni Ewropea kollha. F’survey tal-Kummissjoni Ewropea nstab li f’Malta, wieħed minn kull ħamsa ħassew xi uġigħ fil-ġimgħa. Dan juri li ħafna Maltin u l-familji tagħhom qed jintlaqtu minn din il-problema.

Matul il-presidenza tagħha tal-Unjoni Ewropea, Malta qed tagħti l-appoġġ għal-laqgħa tal-Organizzazzjoni matul il-presidenza tagħha fl-2017. “Ir-rikonoxximent li l-gvern Malti ta lil SIP 2017 juri l-importanza ta’ din il-kwistjoni u tal-impatt li jħalli l-uġigħ fuq is-soċjetajiet. Ninsab kunfidenti li l-konklużjonijiet li ntlaħqu llum jwasslu għall-żvilupp politiku li nkunu nistgħu niddiskutu f’Malta s-sena d-dieħla. Il-preżenza ta’ din il-laqgħa fil-presidenza Maltija hija okkażjoni perfetta biex nisħqu dwar l-importanza li nindirizzaw l-uġigħ kroniku fuq livelli nazzjonali.” qal Alfred Sant waqt Simposju dwar l-impatt tal-Uġigħ fuq is-Soċjeta’ (SIP) fil-Parlament Ewropew fi Brussell.

SIP hija organizzazzjoni internazzjonali maħluqa fl-2010 bl-għan li tiżdied il-kuxjenza dwar l-impatt tal-uġigħ kroniku fuq is-soċjeta`, fil-qasam tas-saħħa u tal-ekonomija; ixxerred l-informazzjoni u metodi li jaħdmu fl-UE; tiżviluppa strateġiji politiċi biex titjieb il-kura fl-Ewropa.