€150 MILJUN GĦAR-RITORN TAL-IMMIGRANTI

Il-Kummissjoni Ewropea se toħroġ €150 miljun biex tiffinanzja programmi ta’ għajnuna għar-ritorn volontarju tal-immigranti u l-integrazzjoni tagħhom fl-Afrika. €115 miljun se jmorru f’għajnuna għall-immigranti maqbuda fil-Libja. Il-programm għandu l-għan li jipproteġi u jevakwa 3, 800 refuġjat mil-Libja u joffri protezzjoni u għajnuna lil 15, 000 immigrant biex jirritornaw volontarjament fil-pajjiż tal-oriġini tagħhom.

€20 miljun se jservu ta’ għajnuna għal immigranti vulnerabbli li jkunu fi tranżitu f’pajjiżi Afrikani oħra. L-għajnuna tissarraf f’servizzi finanzjarji bażiċi, protezzjoni u assistenza legali u psikoloġika.

€15-il miljun se jintefqu f’għajnuna għall-integrazzjoni mill-ġdid ta’ persuni mill-Etjopja. Dawn in-nies se jibbenefikaw minn għajnuna soċjali u psikoloġika u appoġġ ekonomiku. Il-programm maħsub li jgħin immigranti jintegraw aħjar u jsiru aktar awtonomi f’pajjiżhom stess.