200,000 IMMIGRANT GĦALL-ĠERMANJA

Il-Ġermanja se tibda tieħu 200,000 immigrant fis-sena. Dan minkejja li l-pajjiż diġa` laqa’ miljun refuġjat fl-2015. Il-Partit Demokristjan ta’ Angela Merkel (CDU) u l-partit tal-Bavarja (CSU) qablu dwar dan matul it-taħdidiet bejn iż-żewġ partiti. Il-qbil se jservi bħala bidu għat-taħdidiet ma’ żewġ partiti oħra (il-Ħodor u l-FDP) li kollha flimkien mistennija jingħaqdu f’koalizzjoni biex ikun ifformat gvern fil-Ġermanja.  Ħadd mill-partiti tradizzjonali ma kiseb maġġoranza assoluta fl-elezzjonijiet ta’ Settembru. Minkejja li jista’ ma jkunx legali li jitqiegħed limitu ta’ immigranti li qed jitolbu l-ażil, il-Kummissjoni Ewropea iddeskriviet din il-proposta bħala ‘pożittiva’.

‘Għalissa fil-Ġermanja għad ma hemmx gvern u allura din il-mira għadha ’l bogħod milli tikkonkretizza ruħha.’ qalet il-KE li fil-passat  kemm-il darba indikat li ma jistax jitqiegħed limitu fuq in-numru ta’ persuni li qed jitolbu l-ażil.