25,300 TILFU ĦAJJITHOM FIT-TOROQ TAL-EWROPA FL-2017

Madwar 25,300 persuna tilfu ħajjithom fit-toroq tal-Ewropa fl-2017. Dan juri tnaqqis ta’ 2% fuq 2016. Fl-2016 kien ġie reġistrat tnaqqis simili fuq is-sena ta’ qabel.

Fl-2017 kien hemm 135,000 persuna li weġġgħu serjament f’inċidenti fit-toroq tal-Ewropa.

Violeta Bulc, Kummissarju għat-Trasport qalet li minkejja dan it-tnaqqis minimu fl-għadd ta’ mwiet, xorta għadha xettika li jintlaħaq l-għan li jonqsu bin-nofs l-għadd ta’ nies li jmutu f’inċidenti ta’ traffiku bejn 2010-2020.

“Qegħdin nagħmlu progress, iżda jonqos ħafna aktar xi jsir biex nevitaw aktar imwiet fit-toroq tagħna.”, qalet Bulc meta qalet li mietu 49 minn kull 1,000,000 persuna. Din kienet l-anqas ċifra ta’ mwiet fl-istorja tal-UE u hija ħafna anqas mill-imwiet fi nħawi oħra tad-dinja.

Membri stati tal-UE tejbu l-livelli tas-sigurta` u naqqsu r-rata tal-imwiet fit-toroq tagħhom. L-Estonja naqqset l-imwiet bi 32%. Malta u l-Irlanda naqqsu l-imwiet bi 17% u bi 15% rispettivament.

Bulc qalet li biex jintlaħaq tnaqqis ta’ 50% ta’ mwiet fit-toroq Ewropej, fis-snin li ġejjin dawn iridu jonqos b’14% kull sena.

Fis-16 ta’ Mejju Bulc se tniedi proposti ġodda dwar livelli ta’ sigurta` u pjan ta’ azzjoni għal 2020-2030.