470, 000 PERSUNA FIS-SENA BIL-KANĊER TAL-MUSRANA L-KBIRA FL-EWROPA

Il-kanċer tal-musrana l-kbira huwa t-tieni l-aktar kanċer komuni fl-Ewropa. Kull sena, madwar 470, 000 persuna timrad bih. Nofshom imutu. Filwaqt li din il-marda taqbad l-aktar lil dawk li qabżu l-ħamsin sena, hemm żieda inkwetanti fost dawk li għandhom inqas eta`. Fil-kuntest li jeżistu diskrepanzi kbar fl-aċċess għas-servizzi tas-saħħa medika bejn il-pajjiżi, ir-rata ta’ għixien tal-pazjenti bil-kanċer tal-musrana hija akbar f’dawk il-pajjiżi li għandhom aċċess aħjar għall-iscreening, speċjalment screening endoskopiku u kura speċjalizzata.

Dr Sant qal dan waqt li nieda x-xahar iddedikat għall-Għarfien tal-Kanċer tal-Musrana l-Kbira fl-Ewropa organizzata mill-EuroColon fil-Parlament Ewropew fi Brussell.

L-Ewroparlamentari Malti, li għeleb il-kanċer, qal li ċ-ċittadini kollha tal-UE, għandu jkollhom aċċess għall-iscreening tal-musrana l-kbira. Dan l-aċċess, qal Dr Sant,  għandu jkun sempliċi u irħis fil-prezz biex kulħadd ikun jista’ jilħqu.

Iċ-Chairperson ta’ EuropaColon Ms Jola Gore-Booth ferħet lil Malta għas-sistema effiċjenti li għandha għall-iscreening tal-kanċer tal-musrana l-kbira. It-tema tal-Konferenza ta’ din is-sena hija ‘ŻMIEN GĦAL BIDLA’. Ms Gore-Booth qalet li dan it-titlu huwa indikazzjoni ċara li ma sarx biżżejjed progress lejn implimentazzjoni ta’ sistema għall-iscreening tal-kanċer tal-musrana l-kbira tul l-UE.