AKTAR MINN 40% TAL-AWSTRIJAĊI FAVUR IL-LEMIN ESTREM

Ir-riżultat tal-elezzjonijiet presidenzjali Awstrijaċi ħalla kuntenti lil bosta mexxejja Ewropej. Il-President tal-Kunsill tal-Ewropa Donald Tusk qal li fi żmien ta’ sfidi, il-kontribuzzjoni tal-Awstrija biex jinstabu soluzzjonijiet Ewropej komuni u tinżamm l-unita` Ewropea, huma essenzjali. Il-President tal-PE Martin Schultz qal li r-riżultat kien rebħa kontra n-nazzjonaliżmu, il-populiżmu u l-anti-Ewropejiżmu.

B’rebħa ta’ 53% Van der Bellen, mill-Partit tal-Ħodor, rebaħ lill-kandidat tal-Lemin estrem Norbert Hofer. Van der Bellen se jieħu post is-soċjal-demokratiku Heinz Fiscker għas-sitt snin li ġejjin.

Aktar minn 40% fl-Awstrija vvotaw għal Lemin estrem. Ir-riżultat għandu jservi biex il-partiti taċ-Ċentru jindirizzaw it-tħassib tal-popli Ewropej u jqumu mil-letarġija li jinsabu fiha, ikkummenta l-Grupp tal-Ewroxettiċi (ECR group) tal-Parlament Ewropew.