ALI KHAMENEI JŻID IL-PRESSJONI FUQ L-EWROPEJ

Il-Mexxej Suprem tar-Repubblika Iżlamika tal-Iran, Ayatollah Ali Khamenei, qed jitfa’ pressjoni fuq l-Ewropej, b’lista ta’ ilmenti għal pajjiżu biex jibqa’ fil-ftehim nukleari.

“Jekk l-Ewropej joqogħdu lura milli jirrispondu għat-talbiet tagħna, l-Iran huwa intitolat li jerġa’ jibda l-attivitajiet nukleari tiegħu. Ġaladarba nsibu li l-JCPOA (pjan komprensiv ta’ azzjoni konġunta) ma jkollux benefiċċji, waħda mill-għażliet tagħna hija li jerġgħu jibdew l-attivitajiet li konna ikkanċellajna”, wissa Ayatollah Ali Khamenei waqt li enfasizza li ma jafdax lill-Ewropej.

Huwa sejjaħ għal garanziji fuq l-iżvilupp tal-ekonomija Iranjana. “Jekk l-Istati Uniti jirnexxielha tfixkel il-bejgħ taż-żejt tagħna, aħna nbigħu ż-żejt tagħna bl-ammonti li nixtiequ aħna. Il-banek Ewropej għandhom jiggarantixxu tranżazzjonijiet kummerċjali mal-Iran, ” qal Ali Khamenei.

Il-Mexxej Suprem huwa kontra kull diskussjoni dwar il-programm ballistiku Iranjan jew dwar ir-rwol tiegħu fir-reġjun. “Il-mexxejja tat-tliet pajjiżi Ewropej (Franza, Ġermanja u Renju Unit) għandhom jimpenjaw ruħhom u jwiegħdu li ma jqajmux il-kwistjoni tal-missili u tal-affarijiet reġjonali tar-Repubblika Iżlamika. Kulħadd għandu jkun jaf li r-Repubblika Iżlamika tal-Iran ċertament mhux se tirrinunzja għall-poter tagħha, speċjalment fir-rigward tad-difiża”, wissa l-Mexxej Suprem.

Id-diskussjonijiet għadhom għaddejjin dwar ir-rwol ta’ Tehran fil-Jemen, u dwar dan aktarx issir laqgħa ġdida fi Brussell f’Ġunju.

Ir-Rappreżentanta Għolja tal-UE għall-Affarijiet Barranin u l-Politika ta’ Sigurtà Federica Mogherini qalet li l-ftehim mal-Iran (JCPOA) jista’ jibqa’ jgħodd jekk l-Iranjani jibqgħu fih.