ANQAS IMMIGRANTI JASLU L-ITALJA

Il-Kummissjoni Ewropea qalet li sa Awwissu waslu 105, 663 immigrant fl-Italja, ċifra li hija 8% anqas mill-istess perijodu s-sena l-oħra. L-UE qed tagħmel ħilitha biex tassisti l-Italja fis-salvataġġi tal-immigranti fir-rotta tal-Mediterran. Il-KE qalet dan wara li f’dawn l-aħħar ġimgħat, l-awtoritajiet Taljani salvaw aktar minn 13, 000 immigrant. Il-Kummissjoni qalet ukoll li fejn is-sena l-oħra, l-għadd ta’ immigranti għal din is-sena naqas. Is-salvataġġ tal-ħajjiet umani u l-evitar ta’ diżgrazzji fil-baħar hija waħda mill-prijoritajiet tal-Kummissjoni Ewropea.

Il-kap tal-Aġenzija FRONTEX Fabrice Leggeri qal li l-immigranti qed isibu rotot ġodda għall-Ewropa, fosthom ir-rotta tal-Bulgarija. Il-Kummissjoni qalet li hija lesta biex tgħin lil Bulgarija wkoll.

Il-Kummissjoni qalet li t-Turkija għadha ssegwi l-ftehim li ntlaħaq mal-UE dwar l-immigrazzjoni. F’Awwissu, in-numru ta’ immigranti li waslu l-Greċja kien ta’ 112 kuljum mentri fix-xhur ta’ qabel kien 92 kuljum. Dan huwa ferm inqas miċ-ċifri tal-istess perijodu s-sena l-oħra meta kienu jaslu bejn 2,000 u 10,000 immigrant kuljum.

Il-Kummissjoni qalet li qed iżżomm monitoraġġ kontinwu kemm fuq iż-żona tal-baħar tal-Mediterran u kemm fuq il-baħar Eġew. Il-Kummissjoni qalet li ż-żieda fl-għadd ta’ immigranti  fl-aħħar jiem kien minħabba l-kondizzjonijiet favorevoli tat-temp.