ARTISTI GĦAWDXIN FIL-PARLAMENT EWROPEW

Erba’ artisti kontemporanji Għawdxin se jeżebixxu erbgħa u għoxrin xogħol artistiku fil-Parlament Ewropew fi Brussell bejn is-6 u d-9 ta’ Marzu 2018. Rachel Galea, Kris Saliba, Manuel Farrugia u Anthony Caruana ġew mistiedna minn Alfred Sant biex jeżebixxu l-pitturi tagħhom li jixhdu r-realtajiet u l-aspirazzjonijiet Għawdxin fis-sala ewlenija tal-Parlament Ewropew fi Brussell.

“L-interpretazzjonijiet artistiċi tagħhom jistħoqqilhom rikonoxximent bħal dan fil-Parlament Ewropew. Hija parti mill-istrateġija tagħna li nagħmlu l-aspirazzjonijiet u l-kisbiet tal-Għawdxin aktar magħrufa fl-Ewropa.” qal Sant f’laqgħa li kellu mal-artisti Għawdxin fil-Ministeru għal Għawdex.

L-artisti Għawdxin qalu lil Alfred Sant li l-fatt li ġejjin minn gżira żgħira u fil-periferija tal-kontinent Ewropew isaħħaħ id-determinazzjoni tagħhom biex ikunu kreattivi fil-qasam  tagħhom.

Il-post fejn se ssir il-wirja joffri opportunita` biex Ewroparlamentari u viżitaturi tal-Parlament Ewropew jammiraw ix-xogħol ta’ dawn l-artisti li jgħixu fil-periferija tal-Ewropa.