B’€1 IL-PARLAMENT EWROPEW JAKKWISTA MUŻEW

Il-Parlament Ewropew beda jikri binja li kienet id-dar tal-artist Belġjan Antoine Wiertz għal prezz simboliku ta’ €1. Il-binja, li saret mużew, tinsab ħdejn il-Parlament tant li se tibda tintuża bħala estensjoni tal-faċilitajiet tiegħu. Fil-mużew jinsabu bosta xogħlijiet tal-istess artist iżda dawn se jibqgħu propjeta` tal-Gvern Belġjan. Wiertz kien aktar rinomat għad-daqsijiet kbar tal-pitturi li kien joħloq milli għall-ġenjalita` tiegħu.

Il-mużew se jibqa’ miftuħ għal pubbliku imma l-ġnien se jintuża biss għall-avvenimenti organizzati mill-Parlament.

Il-Parlament se jiftaħ ukoll Dar tal-Istorja Ewropea f’bini storiku ieħor ukoll qrib il-bini tal-Parlament. Il-President tal-Parlament Ewropew Martin Schulz qal lill-kollegi tiegħu li l-Parlament Ewropew sar qisu xi fiera b’kull xorta ta’ attrazzjonijiet u ikel u xorb li kollha huma ta’ distrazzjoni mix-xogħol importanti tal-parlament – dak li jinstabu soluzzjonijiet għal kriżijiet Ewropej.