BIEX JAĊĊETTAW L-IMMIGRANTI JRIDU JIĦDULHOM 500,000 ROMA

L’uboš Blaha, Filosofu Marxist u membru parlamentari Slovakk qal li jekk l-Islovakkja għandha ġġorr il-piż tal-immigranti, mela l-kumplament tal-UE għandha tieħu ftit mill-500,000 Roma li hemm imxerrdin fil-pajjiż. Blaha jimmilita fil-partit taċ-Ċentru Xellug SMER. Il-ħsieb ta’ Blaha fis-Slovakkja huwa komuni. Is-Slovakkja hija kontra l-politika tal-Unjoni Ewropea dwar l-immigrazzjoni li tordna lil kull pajjiż jilqa’ numru sostanzjali ta’ immigranti.

Il-Prim Ministru Slovakk Robert Fico qanqal ir-rabja ta’ sħabu l-Ewropej meta qal li s-Slovakkja lesta tieħu biss immigranti li huma Kristjani. Wara l-attakki ta’ Pariġi qal li, “se ngħasses fuq kull Musulman li jgħix f’pajjiżna”. Fico fetaħ kawża kontra l-UE għax ma jridx jaċċetta l-kwoti tal-immigranti li qed timponi l-Kummissjoni u wiegħed lin-nazzjon Slovakk li “qatt m’hu se nġib immigrant wieħed fis-Slovakkja.”

Taħt is-sistema tal-kwoti tal-UE, is-Slovakkja kellha tieħu 802 immigrant rilokati mill-Greċja u l-Italja. Minflok mxiet mar-regola imposta mill-UE, is-Slovakkja għażlet hi 149 refuġjat Kristjan mill-kampijiet fl-Iraq.

80% tal-popolazzjoni Slovakka ma tridx immigranti. Jekk il-gvern jagħmel dak li trid l-UE u jmur kontra l-poplu Slovakk, jikber l-appoġġ lejn il-faxxisti kif qed jiġri fi bliet Ewropej oħra. Is-Slovakki qed jaraw li l-multikulturaliżmu falla f’ibliet bħal Brussell u Pariġi allura jirraġunaw, “Għaliex għandna nippruvaw il-multikulturaliżmu hawn?” Ħarsa fit-toroq Slovakki wieħed jintebaħ li ma hemmx wisq taħlit ta’ razez u kuluri. Is-Slovakki jridu li pajjiżhom jibqa’ eteroġeniku.