BIEX JAQSMU ANQAS IMMIGRANTI LEJN IL-MEDITERRAN

Il-Kummissjoni Ewropea se tipprova tagħti inċentivi lil pajjiżi Afrikani u dawk tal-Lvant Nofsani bħal-Libanu u l-Ġordan biex iżommu l-immigranti f’pajjiżhom.  Din l-istrateġija hija bbażata fuq inċentivi finanzjarji li jistgħu jwasslu għal total ta’ investiment li jlaħħaq €62 biljun.

Il-Kummissjoni qed tipproponi azzjoni fuq żewġ fronti: f’perijodu qasir tipprovdi inċentivi lil pajjiżi. Dawn jinkludu għajnuna finanzjarja għal titjib fit-tmexxija tal-fruntieri tagħhom u għaż-żamma tar-refuġjati f’pajjiżhom; il-pjan fit-tul jinkludi l-finanzjament għall-iżvilupp soċjo-ekonomiku ta’ dawn il-pajjiżi.

Il-pajjiżi li jingħataw il-prijorita` huma n-Niġer, Niġerja, Mali, Etjopja, Senegal, Libanu u l-Ġordan. L-għan tal-Kummissjoni huwa li nieshom jibqgħu f’pajjiżhom. Il-pajjiżi li jaħdmu mal-KE jirċievu trattament speċjali. Id-diskussjonijiet ma’ dawn il-pajjiżi se tiffoka fuq ir-ritorn tal-immigranti. Il-Kummissjoni saħqet li faċilment tista’ ttella’ s-somma ta’ €62 biljun minn sorsi differenti li jinkludu s-settur privat u l-involviment tal-istati membri. Fil-ħarifa l-Kummissjoni se tħejji €3.1 biljun għal dan il-fond.

Il-pajjiżi terzi jridu jwettqu l-obbligi internazzjonali tagħhom biex jieħdu l-finanzjamenti. Dawn l-obbligi jinkludu – tmexxija tajba tal-fruntieri kif ukoll id-dħul taċ-ċittadini tagħhom lura pajjiżhom. Il-Kummissjoni qalet li din l-istrateġija tgħin biex jonqsu l-immigranti li jittantaw xortihom billi jaqsmu l-Mediterran.