BREXIT: €10 BILJUN ANQAS FIS-SENA GĦALL-UE

Il-ħruġ tar-Renju Unit mill-Unjoni Ewropea se jħalli nuqqas ta’ €10 biljun ewro fis-sena fil-baġit Ewropew. Il-Prim Ministru Theresa May ħabbret li r-Renju Unit mhux se jibqa’ jikkontribwixxi fil-baġit Ewropew meta joħroġ mill-Unjoni.  Il-baġit Ewropew se jiġi rivedut b’riformi fin-nefqa biex l-Unjoni tagħmel tajjeb għal dat-telf. Din se tkun opportunita` għall-UE biex tkejjel l-ispejjeż reali tagħha u l-benefiċċji tagħha.

Biex ipattu għal dan it-telf, l-istati membri tal-Unjoni aktarx iżidu l-kontribuzzjonijiet tagħhom. L-aktar pajjiżi milquta huma l-Ġermanja, l-Olanda, l-Awstrija, l-Isvezja u  Franza. L-aktar pajjiżi affettwati jekk tonqos l-ispiża tal-Unjoni huma l-Ungerija, il-Greċja u l-pajjiżi ċentrali tal-Ewropa.

Għażla oħra tista’ tkun dik li l-Unjoni ddaħħal aktar flus fil-baġit tagħha. Qed tissemma’ reviżjoni tal-VAT, u taxxi marbuta ma’ attivitajiet finanzjarji. Dħul ieħor jista’ jinħoloq minn fuq l-ambjent u l-klima, minn fuq il-fuel u taxxa indiretta minn fuq oġġetti manifatturati f’pajjiżi terzi. Id-deċiżjoni li tittieħed f’dan ir-rigward teħtieġ ftehim unanimu fil-Kunsill tal-Unjoni Ewropea bejn il-mexxejja tal-istati membri.

Fl-aħħar ta’ Frar kull kumitat tal-Parlament Ewropew mistenni jippreżenta rapport dwar l-impatt tal-Brexit fuq l-oqsma kompetenti tal-kumitati. Dan ir-rapport se jservi ta’ qafas għan-negozjati bejn l-Unjoni u r-Renju Unit li jibdew f’Marzu.

Sadattant il-Qorti Suprema Ingliża qatgħetha li l-Gvern ma jistax jattwa Artiklu 50 mingħajr qbil fil-Parlament.