DAQSHEKK PRODUZZJONI TAL-AIRBUS

Airbus ħabbret li sal-2021 tkun waqfet il-produzzjoni tal-A380 , l-ikbar ajruplan tal-passiġġieri. Dan wara li l-linja tal-ajru Emirates naqqset il-flotta tal-A380 minn 162 għal 123. Emirates se tieħu 14-il ajruplan A380 biss fis-sentejn li ġejjin. Il-kumpanija minflok se tixtri 70 ajruplan iżgħar – A330neo u A350 jets.

L-A380 kienet it-tweġiba Ewropea għal Boeing 747 tal-Istati Uniti, iżda dan l-ajruplan daħal fis-suq meta ħafna kumpaniji tal-ajru kienu qed jagħżlu ajruplani iżgħar u li jgħaġġlu aktar u jaħlu inqas.

L-ewwel titjira kummerċjali ta’ dan it-tip ta’ ajruplan li jiswa €400 miljun saret minn Singapore Airlines fl-2007. Fil-kriżi finanzjarja tal-2008 il-proġett baqa’ f’wiċċ l-ilma permezz ta’ din il-kumpaniji u tal-Emirates.