DAWK BI DĦUL BAXX L-AKTAR LI JBATU MINN MARD IKKAWŻAT MILL-ĦXUNA

Dawk is-saffi tal-popolazzjoni li għandhom dħul baxx huma l-aktar li jbatu mill-obesita` u huma l-aktar li jsofru minn mard ikkawżat mill-ħxuna. Dr. Alfred Sant, li kien qed jindirizza diskussjoni dwar l-obesita` fi Brussell, qal li l-obesita` tista’ tkun indirizzata permezz ta’ politika li tolqot lil gruppi li qegħdin f’saff soċjo-ekonomiku baxx. Ħafna drabi huma raġunijiet ekonomiċi li jwasslu biex matul il-ġurnata n-nies jagħżlu ikel li ma jiswiex flus.

Dr Sant kien mistieden jindirizza konferenza dwar l-obesita` fl-Ewropa organizzata mill-Assoċjazzjoni Ewropea għall-Istudju tal-Obesita`, grupp ta’ professjonisti li jispeċjalizzaw fil-kura tal-obesita`. Id-diskussjoni kienet immexxija minn John Bowis, ex-Membru Parlamentari Konservattiv Ingliż u Ministru tal-Finanzi. Dr Sant kien mistieden għad-diskussjoni wara Mistoqsija Parlamentari lill-Kummissjoni Ewropea dwar ir-relazzjoni bejn l-obesita` u l-gruppi li qegħdin f’saff soċjo-ekonomiku baxx.

Il-Kummissjoni Ewropea trid twieġeb mistoqsijiet ta’ Dr Sant dwar il-pjanijiet li se twettaq fil-futur biex tindirizza l-aspett soċjali tal-obesita` wara l-publikazzjoni tal-White Paper tal-Kummissjoni dwar Strateġija Ewropea għad-dieta, il-piż żejjed u kwistjonijiet oħra relatati mal-obesita`. Dr Sant staqsa lill-Kummissjoni biex tipprovdi informazzjoni dwar ir-relazzjoni li hemm bejn l-obesita` u n-nies li ġejjin minn saffi soċjo-ekonomiċi baxxi fl-Unjoni Ewropea. Staqsa wkoll biex il-Kummissjoni tipprovdi lista li turi riżultati tanġibbli tal-kisbiet s’issa dwar ir-relazzjoni bejn l-obesita` u n-nies li ġejjin minn problemi soċjo-ekonomiċi. Dr Sant staqsa lill-Kummissjoni biex turi x’qafas se jkun hemm għall-ġejjieni biex tindirizza din il-kawża partikolari ta’ obeżita` fl-Unjoni Ewropea.

Membri tal-Kunsill tal-Pazjenti u tal-Assoċjazzjoni Ewropea tal-Cancer Leagues attendew il-laqgħa u faħħru l-inizjattiva ta’ Dr Sant dwar l-obesita` u tkellmu wkoll dwar il-prevenzjoni u l-immaniġjar tal-obesita` fl-Ewropa.