DEHRA ĠDIDA GĦALL-ASSEMBLEA NAZZJONALI FRANĊIŻA

Wara l-elezzjonijiet presidenzjali Franċiżi li fihom tela’ l-President Emmanuel Macron, issa qed isiru l-elezzjonijiet parlamentari li fihom jinkisbu s-siġġijiet fil-Parlament. Wara l-ewwel round, l-indikazzjoni hija li fit-tieni round li se jsir il-Ħadd li ġej, il-partit ta’ Macron La République en Marche u l-alleati tiegħu tal-Moviment Demokratiku se jiksbu 445 siġġu mill-577 tal-Assemblea Nazzjonali.

Il-partit ta’ Macron ġie fformat daqs sena ilu u ħafna mill-kandidati tiegħu għandhom ftit jew l-ebda esperjenza fil-qasam politiku.

Il-voti fl-ewwel round kien hekk – il-Partit ta’ Macron u tal-Moviment Demokratiku flimkien kisbu 32.3%. Il-Partit Repubblikan taċ-ċentru lemin kiseb 21.5% u dak tal-lemin estrem kiseb 13.2%. Il-Partit tax-xellug estrem kiseb 11% filwaqt li dak tas-soċjalisti ġab biss 9.5%. F’din l-elezzjoni naqsu drastikament in-nies li ħarġu jivvotaw – 48.7% meta mqabbel mal-57.2% tal-2012.

S’issa ġew eletti biss erba’ siġġijiet u kollox ikun konkluż nhar il-Ħadd. L-elezzjonijiet qed isiru qalb sigurta` assoluta wara l-attakki terroristiċi li seħħew f’dawn l-aħħar snin.

Jekk l-indikazzjonijiet huma tajbin u verament il-Partit ta’ Macron jikseb dan ir-riżultat, din il-kisba tkun riżultat straordinarju u tbiddel għal kollox id-dehra tal-Assemblea Nazzjonali Franċiża hekk kif mijiet ta’ membri parlamentari ġodda jibdew deħlin fi ħdanha filwaqt li tiċkien is-saħħa tal-partiti tradizzjonali.