DISKUSS IL-KUMMERĊ BEJN IL-ĠAPPUN U L-UE

Il-Ġappun determinat li jagħti spinta lin-negozjati dwar ftehim ta’ kummerċ ħieles u investiment mal-UE. Il-Kummissarju tal-Kummerċ Cecilia Malmstrom laqgħet din id-deċiżjoni u qalet li tixtieq li jintlaħaq qbil sal-aħħar ta’ din is-sena. Il-Kummissarju qalet li ftehim bħal dan iżid il-possibilitajiet ta’ kummerċ, l-impjiegi u t-tkabbir ekonomiku. In-negozjati ilhom li bdew mill-2013. Waqfu għal kollox fl-2015 biex reġgħu bdew mill-ġdid f’April ta’ din is-sena.

Bħalissa l-Unjoni Ewropea għaddejja b’taħdidiet għal kummerċ ħieles u investiment mal-Kanada (CETA), l-Istati Uniti (TTIP) u mal-pajjiżi magħrufa bħala MERCOSUR (Arġentina, Brażil, Paragwaj u Urugwaj – u l-Veneżwela li mhux tieħu sehem fit-taħdidiet).

Il-Brażil jixtieq jikkonkludi t-taħdidiet fi żmien sentejn. Il-Kummissarju Ewropea tal-Kummerċ Malmstrom kienet kawta u ma ntrabtitx ma’ żmien stipulat.

Il-ftehim ta’ kummerċ mal-Kanada ġie ffinalizzat sentejn ilu u riesaq biex jiġi approvat mill-Parlamenti Ewropej u dak Kanadiż. Fil-każ tal-ftehim tal-Istati Uniti qamu oġġezzjonijiet u diffikultajiet kbar dwar ’il fejn se jwassal dan il-ftehim. In-negozjati għadhom għaddejjin iżda żgur li mhux se jkunu finalizzati sal-aħħar ta’ din is-sena.

Il-bdiewa Ewropej għaddejjin minn żmien diffiċli u qed jitolbu protezzjoni speċjali fuq il-laħam u l-prodotti tal-ħalib. Dan ifisser li l-progress fin-negozjati fuq dawn is-setturi jaf ikun diffiċli ħafna.