DIŻGWID DWAR IL-BAĠIT TALJAN

Il-President tal-Kummissjoni Ewropea Jean Claude Juncker qal li ma jistax jaċċetta ż-żieda fl-infiq ippjanat mill-Gvern Taljan fil-baġit nazzjonali. Juncker qal li l-Italja trid tirrispetta l-impenn li ħadet mal-UE li tnaqqas id-dejn pubbliku nazzjonali.

L-Italja issottomettiet dokument tal-baġit li jżid id-defiċit b’2.4% tal-PGD.

“Jekk naċċettaw din iż-żieda ta’ defiċit…. pajjiżi oħra tal-UE jinsulentawna, u jakkużawna li qed inkunu wisq flessibbli mal-Italja.” qal Juncker.

Kull pajjiż fiż-żona ewro jrid jippreżenta l-baġit nazzjonali tiegħu lil Kummissjoni sa nofs Ottubru biex l-UE tikkontrolla l-infiq tal-pajjiżi.

Il-Prim Ministru Taljan Giuseppe Conte qal li żieda fin-nefqa hija meħtieġa biex tinċentiva l-investiment fil-pajjiż.

“Aħna konvinti li t-triq tal-awsterita` hija triq li ma nistgħux nibqgħu nimxu fiha.” qal Conte iżda l-pjan tiegħu mistenni jqanqal reazzjoni iebsa mill-pajjiżi taż-żona ewro.

Il-President tal-Kunsill tal-Unjoni Ewropea Donald Tusk qal li minkejja d-diżgwid, xorta huwa possibbli li jintlaħaq qbil dwar il-baġit Taljan sa Diċembru.

Il-Kummissjoni diġa` wissiet lil Italja, permezz ta’ ittra, li l-abbozz tal-baġit li ppreżentat “jiddevja” mill-pjanijiet u l-impenji li kellha l-Italja mal-pajjiżi taż-żona ewro. Il-Kummissjoni qed titlob aktar informazzjoni. Jekk l-Italja tibqa’ ssostni l-pożizzjoni tagħha il-Kummissjoni ma taċċettax l-abbozz tal-baġit Taljan. F’dak il-każ l-Italja tkun trid terġa’ tikteb il-baġit tagħha.