€100 MILJUN  BIEX JINBIGĦ AKTAR GASS FL-UE

L-industrija tal-gass Ewropea nefqet €100 miljun fl-2016 biex tinfluwenza entitajiet governattivi tal-UE. Dan ġie żvelat minn Corporate Europe Observatory (CEO) li huwa grupp li jinvestiga kif kumpaniji u korporazzjonijiet kbar jinfluwenzaw il-politika tal-UE. L-industrija tal-gass impjegat mal-elf persuna għall-organizzazzjoni ta’ attivitajiet fil-Parlament Ewropew u laqgħat maż-żewġ Kummissarji relatati mal-enerġija biex “jinfluwenzaw l-aġenda politika tagħhom, bl-għan li jżidu l-profitti tagħhom askaptu tal-klima.”

Biex tħalli l-influwenza tagħha, l-industrija tal-gass ħadet sehem f’460 laqgħa mal-Kummissjoni Ewropea u mal-Viċi President tal-Enerġija u l-Klima Miguel Arias Canete bejn Novembru tal-2014 u Awwissu tal-2017. Dan ifisser medja ta’ tliet laqgħat fil-ġimgħa.

Il-Grupp CEO jikkritika lil Canete għax fil-passat kien involut fl-industrija tal-gass u ż-żejt, għad għandu rabtiet ma’ din l-industrija u qed imexxi l-aġenda tal-industrija tal-gass fl-aktar livell politiku għoli bil-kollaborazzjoni sħiħa tal-mexxejja nazzjonali. Il-pjan hu li jinħoloq suq integrat tal-gass fl-UE permezz ta’ infrastruttura ġdida.

Minflok investiment fl-enerġija mix-xemx, ir-riħ u l-kurrenti tal-ibħra, l-istrateġija tal-UE għall-futur tinkorpora aktar pajpijiet biex tiżdied l-importazzjoni tal-gass mill-Ażerbajġan u l-Alġerija.