€235 MILJUN GĦALL-IŻVILUPP SOĊJO-EKONOMIKU LIL PAJJIŻI TAL-MEDITERRAN

Il-Kummissjoni Ewropea se tagħti pakkett ta’ €235.7 miljun għall-iżvilupp soċjo-ekonomiku lil pajjiżi ġirien tagħha fil-Mediterran. Minn dawn l-Eġittu se tibbenefika minn €59 miljun li se jintefqu fi programmi favur id-drittijiet tal-bniedem, l-iżvilupp tas-settur privat, l-iżvilupp urban, fis-settur tal-enerġija u tal-ilma. €15-il miljun se jmorru għal-Libanu bl-għan li jitjieb l-iżvilupp ekonomiku u jitjiebu wkoll il-kundizzjonijiet ta’ għejxien ta’ nies vulnerabbli f’dan il-pajjiż. Barra minnhekk €88 miljun oħra se jmorru għall-Palestina biex igawdu minnhom nies li qed jgħixu f’kundizzjonijiet diffiċli u anki għall-Awtoritajiet Palestinjani.

It-€73.7 miljun li jifdal se jintużaw biex titjieb il-kooperazzjoni fuq livell reġjonali u biex jingħelbu diffikultajiet bħall-immigrazzjoni, il-ħolqien tal-impjiegi kif ukoll għall-integrazzjoni tas-soċjetajiet ċivili fi djalogu politiku.