€365.5 MILJUNI GĦALL-MAROKK, L-ALĠERIJA, IL-ĠORDAN U L-LEBANON

L-Unjoni Ewropea ħabbret li se tagħti għajnuna finanzjarja li tlaħħaq it-€365.5 miljuni lil erba’ pajjiżi tal-Mediterran – l-Alġerija, il-Ġordan, il-Lebanon u l-Marokk. Dawn il-flejjes se jmorru għall-iżvilupp tas-settur privat, għal ħidma favur riformi demokratiċi u għall-kundizzjonijiet ta’ għejxien aħjar fil-pajjiżi tas-Sud tal-Mediterran. L-Alġerija se tirċievi €25 miljun, il-Ġordan €135 miljun, il-Lebanon €25 miljun u l-Marokk €180.5 miljun. Deċiżjonijiet oħra se jittieħdu fir-rigward tat-Tuneżija u l-Eġittu.

Il-pakkett ta’ għajnuna finanzjarja se jkun imqassam hekk: €237 miljun għall-iżvilupp tas-settur privat, €100 miljun se jmorru biex jitjiebu l-kundizzjonijiet ta’ għixien pereżempju permezz ta’ inizjattivi biex jitnaqqas il-faqar u aċċess għal servizzi mediċi bażiċi. €28.5 miljun se jservu bħala appoġġ biex isiru riformi demokratiċi fl-Alġerija, il-Lebanon u l-Marokk. L-UE hija tal-idea li din l-għajnuna hija meħtieġa fid-dawl tad-diffikultajiet li dawn il-pajjiżi qed iġarrbu.