EKWIPAĠĠI MULTI-NAZZJONALI GĦALL-FRONTEX

Frontex, l-aġenzija li tgħasses il-fruntieri Ewropej minn din is-sena bdiet tuża ekwipaġġi multi-nazzjonali fl-operazzjonijiet marittimi tagħha. Frontex talbet lill-istati membri u lill-pajjiżi tax-Schengen jipprovdu uffiċċjali biex jgħinuha fir-rwol tagħha, waqt li enfasizzat li dan joħroġ l-ispirtu tal-koperazzjoni Ewropea. F’sitwazzjoni ta’ emerġenza din l-aġenzija issa għandha l-mezzi li tibgħat mal-1,500 uffiċċjal fi żmien qasir.

Frontex bdiet tuża tliet patrol boats mill-Finlandja, Rumanija u Franza b’ekwipaġġ multi-nazzjonali Ewropew għall-ewwel darba. Qabel, l-istati membri kienu jipprovdu kemm id-dgħajjes u anki l-ekwipaġġi, biex jipparteċipaw f’operazzjonijiet tal-Frontex.

L-għan hu li l-Frontex tinbidel u ssir aktar effettiva meta tassisti l-istati membri fuq il-fruntieri marittimi tagħhom. Issa l-istati membri jistgħu jipprovdu mezzi b’ekwipaġġ bażiku għal żmien twil mingħajr ma jkollhom għalfejn jibagħtu numru kbir ta’ uffiċċjali minn pajjiżhom. Il-kumplament tal-ekwipaġġ se jkunu ġejjin minn stati membri oħra.