ELEZZJONI QABEL IŻ-ŻMIEN GĦAL SPANJA

Il-Prim Ministru Spanjol Pedro Sánchez ħabbar elezzjoni bikrija fit-28 ta’ April, 9 xhur biss minn mindu sar Prim Ministru, wara li ma rnexxilux jikseb l-appoġġ mill-Parlament għall-baġit tal-2019.

Sánchez, li kien qed imexxi bi gvern ta’ minoranza, kellu bżonn l-appoġġ ta’ bosta partiti oħra biex jgħaddi l-baġit. Iżda wara li d-djalogu mas-separatisti Katalani ikkollassa, dawn ivvotaw kontra.

“Il-Katalani iridu jispjegaw għaliex ma aċċettawx baġit li nemmen li kien se jħalli impatt soċjali tajjeb fuq il-Katalonja wkoll,” qal Sánchez.

Il-Prim Ministru Spanjol ilu fil-gvern minn Ġunju, wara li Mariano Rajoy tilef vot ta’ fiduċja minħabba skandli ta’ korruzzjoni. Dak inhar, iż-żewġ partiti nazzjonalistiċi Katalani kienu ma’ Sánchez.

Il-kamra tad-deputati se tkun xolta f’Marzu u minn hemm tibda l-kampanja elettorali.