F’AĠENDA MOĦBIJA MAL-FORZI ANTI-GOVERNATTIVI F’MALTA

Alfred Sant iddeplora l-manuvri ta’ ċerti Parlamentari Ewropej biex jagħmlu lil Malta wkoll suġġetta għal restrizzjonijiet fuq l-istat tad-dritt filwaqt li jaqsmu l-aġenda moħbija tal-forzi anti-governattivi f’Malta. F’intervent fil-Parlament Ewropew dwar l-istat tad-dritt u d-drittijiet fundamentali fl-Ungerija, Dr Sant qal li l-eżami tar-rispett tal-istat tad-dritt u d-drittijiet fundamentali fl-Ungerija u bnadi oħra fl-Unjoni Ewropea jeħtieġ li jsegwu metodu trasparenti u oġġettiv,  li jidher ukoll li huwa ġust u mhux ibbażat fuq polemiċi partiġġjani.

Alfred Sant qal li huwa xettiku dwar dawn l-investigazzjonijiet fil-Parlament Ewropew. Bħala eżempju huwa iddeplora l-metodi kif il-membri tal-Parlament Ewropew qed jimmanuvraw biex jagħmlu lil Malta suġġetta għal restrizzjonijiet tal-istat tad-dritt. Dawn qed juru li qed jinjoraw il-fatti sfaċċatament u qed jaċċettaw kummenti u analiżi li huma politikament distorti. Qed jikkollaboraw fil-miftuħ ma’ forzi anti-governattivi f’Malta, filwaqt li jaqsmu l-aġendi moħbija tagħhom.

Jekk l-UE tagħmel investigazzjonijiet bħal dawk li saru dwar Malta, dan allura jkun proċess tal-mistħija  u jtebba’ r-rabta li l-UE għandha favur id-demokrazija u fir-rigward tal-istat tad-dritt.

F’Marzu li ġej il-Parlament Ewropew se jiddiskuti rapport dwar in-nuqqasijiet potenzjali tal-istat tad-dritt fis-Slovakkja u f’Malta.