FAVUR ID-DRITTIJIET SOĊJALI TAL-ĦADDIEMA 

Il-Parlament Ewropew approva r-rapport ‘Il-Kolonni Ewropej għad-Drittijiet Soċjali’ li joħloq qafas għall-kundizzjonijiet diċenti fis-settur tal-impjiegi fil-pajjiżi taż-żona Ewro. Ir-rapport, immexxi minn Maria-Joao Rodrigues (S&D, Portugall), jidentifika numru ta’ prinċipji dwar il-ħtiġijiet u l-isfidi fil-qasam tax-xogħol u l-politika soċjali.

L-Ewroparlamentari Malti Alfred Sant ivvota favur ir-rapport. Dr Sant qal li filwaqt li l-metodi li huma proposti jridu jkunu applikati tul l-UE kollha, ma jfissirx li l-implimentazzjoni tagħhom għandhom ikunu armonizzati fl-istati membri li għandhom karatteristiċi ekonomiċi u soċjali differenti. Dr Sant qal li l-parti l-kbira tal-applikazzjoni tagħhom se tkun f’idejn l-awtoritajiet nazzjonali li se jiddeterminaw meta u kif se jkunu applikati fil-kuntest tal-ħtiġijiet ekonomiċi u soċjali li dejjem qed jinbidlu fi ħdan il-komunitajiet tagħhom.

Dr Sant qal li r-rapport jitratta l-oqsma kollha tal-politika soċjali. “Irridu nfasslu l-prijoritajiet fuq il-liġijiet tax-xogħol u s-sigurta` soċjali; l-edukazzjoni; il-pensjonijiet. Ir-realta` hi li l-prinċipji li qed jiggwidaw it-tmexxija tal-ekonomija fl-UE huma, bħala parti mill-politika Ewropea, marbuta mal-perspettiva neo-liberali. Fiż-żona ewro, dan wassal għal deċiżjonijiet li jpoġġu t-toqol soċjali tal-istrateġiji ekonomiċi fuq il-ħaddiema u dawk li jifilħu l-anqas. Dan jikkontradixxi bi kbir dak li kien ikkunsidrat bħala il-mudell soċjali Ewropew. Għalhekk wieħed issa jiddubita kemm wegħda Ewropea favur id-drittijiet soċjali se tkun segwita matul is-snin.” argumenta Dr Sant.