FRANZA TITLOB L-GĦAJNUNA TAL-EWROPA

It-terrur tal-aħħar ġranet kompla żied l-inċertezza fi Franza li għadha u se tibqa’ fi stat ta’ emerġenza sa tmiem is-sena.  Franza kienet diġa` talbet aktar solidarjeta` mill-pajjiżi Ewropej wara l-attakk terroristiku ta’ Nizza. Il-Ministru tal-Affarijiet Barranin Franċiż Ayrault invoka l-artiklu 42.7 tat-Trattat dwar is-solidarjeta` Ewropea f’każ ta’ attakk fuq stat membru. Wara l-attakki ta’ Pariġi f’Novembru 2015, ħafna pajjiżi taw l-assistenza lil Franza fosthom pajjiżi kbar bħall-Ġermanja iżda anki pajjiżi iżgħar bħar-Repubblika Ċeka.

Franza qed iżżid il-preżenza tas-suldati fit-toroq Franċiżi, speċjalment f’żoni sensittivi. Dan żied il-pressjoni fuq l-Armata Franċiża li qed tagħmel ħidma interna fi Franza stess u anki ħidma esterna fil-pajjiżi lil hinn mill-UE. Franza qalet li jeħtieġ aktar sforzi fil-Lvant Nofsani u l-Afrika biex ikunu stabilizzati l-pajjiżi ġirien tal-UE. Jeħtieġ ukoll aktar xogħol fil-qasam intern għall-ġlieda kontra t-terroriżmu, li jinkludi tqassim ta’ informazzjoni bejn is-servizzi sigrieti tal-pajjiżi tal-UE.

Il-Ministri tal-UE kkonfermaw li jaqblu li jżidu l-assistenza tagħhom. Ir-Rappreżentanta Għolja tal-Affarijiet Barranin tal-UE Federica Mogherini kkonfermat ir-rieda tal-pajjiżi membri li jgħinu lil Franza fuq bażi tal-Artiklu 42.7 tat-Trattat.