FTIT SUSTANZA F’VENTOTENE

Lill-Prim Ministru Taljan Matteo Renzi din il-ġimgħa rajnih jilqa’ lil Kanċilliera Ġermaniża Angela Merkel u lil President Franċiż Francois Hollande fuq il-gżira ta’ Ventotene, qrib Napli. Il-laqgħa saret 3 ġimgħat qabel is-summit ta’ Settembru fejn il-mexxejja tas-27 pajjiż se jiltaqgħu biex jiddiskutu l-futur tal-UE wara l-Brexit. Il-Ġermanja saħqet li l-pajjiżi kollha se jieħdu sehem fid-dibattitu dwar il-futur iżda xtaqet li tilħaq qbil ma’ Pariġi u Ruma fuq ċertu punti qabel is-summit.  Il-laqgħa kienet mimlija simboliżmu hekk kif il-mexxejja tat-tliet l-akbar pajjiżi tal-UE dehru flimkien f’Ventotene fejn Ernesto Rossi u Altiero Spinelli, żewġ anti-faxxisti, fl-1941 kitbu l-‘Ventotene Manifesto’  fejn saħqu dwar l-unifikazzjoni tal-Ewropa.

It-tliet mexxejja tkellmu fuq il-passat glorjuż tal-Ewropa u qalu li l-futur se jkun żmien sabiħ. L-enfażi tad-diskussjoni ftit li xejn semmiet il-preżent mtebba’ bl-attakki terroristiċi, it-telfa tal-Brexit u r-rogħda li qabdet lis-swieq finanzjarji. Renzi qal, “Se niktbu l-paġna li jmiss tal-futur”. Is-sustanza ta’ kif se jagħmel dan, ma ħarġitx. Ma ssemma’ l-ebda pjan ekonomiku, l-ebda pjan strateġiku għat-terroriżmu u l-immigrazzjoni, l-ebda ħjiel dwar it-triq ’il quddiem wara l-Brexit. Minħabba l-elezzjonijiet ta’ sena oħra, fl-2017 it-tliet mexxejja jew parti minnhom, jaf ma jkunux għadhom fit-tmun tal-pajjiżi tagħhom. Allura f’dak il-każ, ma tantx ikunu jistgħu jiktbu l-futur tal-Ewropa.

Ix-xena navali li ntgħażlet għad-dramm li segwejna din il-ġimgħa kien maħsub u ppjanat. L-aircraft carrier Taljan ‘Giuseppe Garibaldi’ kellu parti importanti fil-ħidma tal-UE biex taqbad lit-traffikanti tan-nies fil-Mediterran. Is-simboliżmu ħareġ ħafna wkoll meta l-mexxejja tkellmu dwar Ventotene u Altiero Spinelli li b’mod sigriet fl-1941 kiteb dwar il-viżjoni tiegħu ta’ Ewropa federali. Il-mexxejja qalu li jridu jiggarantixxu  sigurta` fil-ħarsien tal-valuri Ewropej. Intant fl-imħuħ tal-popli Ewropej, is-sens ta’ sigurta` qed jonqos ma’ kull attakk terroristiku.

Permezz tar-rettorika tas-soltu l-mexxejja saħqu dwar aktar koordinament, aktar protezzjoni fuq il-fruntieri, aktar tqassim ta’ informazzjoni akkwistat mill-ispjunaġġ. Dan iwassal għal aktar sigurta` u inqas terrur u traffikar tal-bnedmin.

Fir-rebbiegħa tal-2017 mistennija l-elezzjonijiet Franċiżi, fil-ħarifa tal-istess sena dawk Ġermaniżi. L-attivita` ta’ Ventotene kien sfond ikkulurit għal din il-laqgħa. Ftit smajna bi proposti ġodda u effettivi għall-isfidi tal-popli Ewropej. Fil-verita` rajna ħafna ritratti tat-tliet mexxejja Ewropej, iżda ftit sustanza biex nilqgħu għall-isfidi tal-immigrazzjoni u t-terroriżmu li qegħdin jaffettwaw il-ħajja ta’ tant popli Ewropej.