GŻEJJER U REĠJUNI TAL-UE GĦANDHOM JIĠU EŻENTATI MIR-REGOLI TAL-KOMPETIZZJONI

Il-gżejjer u reġjuni tal-Unjoni Ewropea għandhom ikunu eżentati kompletament mir-regoli tal-kompetizzjoni tal-UE meta dawn japplikaw għal sussidji u għajnuniet tal-istat. Dan qalu l-Kap tad-Delegazzjoni Laburista fil-Parlament Ewropew meta indirizza Konferenza dwar il-gżejjer u reġjuni tal-UE fil-Parlament Ewropew fi Strasburgu. Dr Sant qal li din l-eżenzjoni ma taffettwa bl-ebda mod l-operazzjonijiet tas-suq intern Ewropew u jista’ jsir skrutinju regolari li jiżgura li ma jsirux abbużi b’dawn l-arranġamenti. Anqas minn 4% tal-popolazzjoni Ewropea tgħix fi gżejjer jew reġjuni fis-sud fl-Ewropa.

“Il-gżejjer u r-reġjuni fil-periferija għandhom jinsistu li l-‘grants’ ikunu parti mill-istrumenti għall-iżvilupp reġjonali. Minħabba ċ-ċirkostanzi partikolari tal-gżejjer u r-reġjuni fil-periferija, l-għajnuna tal-istat għandha tagħmel tajjeb għall-iżvantaġġi li jkollhom jegħlbu dawn ir-reġjuni, speċjalment f’kuntest ta’ unjoni ekonomika u monetarja.

“L-Unjoni Ewropea għandha tgħin fid-diġitalizzazzjoni tas-setturi kollha biex tingħeleb il-periferalita` tal-gżejjer u r-reġjuni. Ħafna mill-proġetti f’dawn iż-żoni, fi żmien qasir jew medju, ma jkollhomx ċans li jrendu biżżejjed fis-swieq finanzjarji. Għalhekk jeħtieġ li l-għajnuna tal-istat tkun mekkaniżmu ċentrali fil-proġetti diġitali.”

Dr Sant qal li jeħtieġ sforzi politiċi biex nikkonvinċu lil dawk li jieħdu d-deċiżjonijiet fl-UE, li l-gżejjer u r-reġjuni fil-periferija għandhom jingħataw ftehim ġust – wieħed li jirrifletti l-bżonnijiet taċ-ċirkostanzi tagħhom, sakemm ma aħniex lesti li nħalluhom jaqgħu lura u jintelqu.