ĦAFNA ANQAS IMMIGRANTI FIL-GŻEJJER GRIEGI

L-għadd ta’ immigranti li waslu fil-gżejjer Griegi niżel b’90% minn Marzu għal April. F’April waslu 2,700 immigrant. Dan it-tnaqqis ġej mill-ftehim tal-UE mat-Turkija u aktar kontrolli stretti fuq il-fruntieri bejn il-Maċedonja u l-Greċja. L-akbar għadd ta’ immigranti jibqa’ mis-Sirja. Warajhom hemm il-Pakistani, Afgani u Iraqqini.

Dan jikkuntrasta mal-iżviluppi fiċ-ċentru tal-Mediterran. Fl-Italja l-għadd ta’ immigranti li waslu minn Ġunju tas-sena l-oħra huwa akbar mill-għadd li qed jaslu fil-gżejjer Griegi. F’April waslu 8,370 immigrant fl-Italja.

L-akbar għadd ta’ immigranti fl-Italja ġew mill-Eritrea, l-Eġittu u n-Niġerja.

FRONTEX qalet li ma jidhrux sinjali ta’ ċaqliq sinjifikanti mil-Lvant għaċ-ċentru tal-Mediterran. L-għadd ta’ immigranti li ppruvaw jidħlu fl-Ewropa naqas bi kwart f’April meta mqabbel ma’ Marzu. F’April daħlu 3,830 immigrant fl-Ewropa.