ĦAMES PAJJIŻI JESTENDU L-KONTROLLI FUQ IL-FRUNTIERI TAX-‘SCHENGEN’

Ħames pajjiżi tal-UE, flimkien man-Norveġja, qed iżidu l-kontrolli fuq il-fruntieri tax-‘Schengen’ fid-dawl tal-aħħar żviluppi dwar l-influss tal-immigrazzjoni u t-theddida tat-terroriżmu. Biss, biss f’Diċembru l-Greċja rat 108, 000 immigrant ġdid. Filwaqt li qed tagħmel dak li hu possibbli biex tirreġistrahom, irnexxielha tieħu l-‘fingerprints’ ta’ 80% minnhom, titjieb mill-50% ta ftit xhur ilu.

L-Awstrija qed tistudja l-possibilita` li timponi limitu fuq l-għadd ta’ immigranti jitolbu l-ażil. Il-Kanċillier Awstrijakk Werner Faymann ħabbar li n-numru għas-sena 2016 se jkun ta’ 37, 500. Fl-2015, l-Awstrija kellha aktar minn 90, 000 talba għal ażil. Dan il-pajjiż jixtieq li jillimita l-persuni li jibbenefikaw mill-protezzjoni tiegħu fit-tliet snin li ġejjin u lest jilqa’ 1.5% tal-popolazzjoni totali tiegħu li hi ta’ 8.5 miljun

Fl-2015 il-mexxejja Ewropej kienu qalu li mhux possibbli li jkun hemm xi tip ta’ limitu dwar in-nies li jitolbu l-ażil. Aġir ta’ dan it-tip ikun irid jiġi eżaminat fil-kuntest tal-obbligazzjonijiet internazzjonali tan-Nazzjonijiet Uniti.

Bħalissa l-Awstrija stess flimkien ma’ erba’ stati membri oħra u n-Norveġja qed iwettqu l-kontrolli fuq il-fruntieri minkejja li qegħdin fis-sistema ‘Schengen’. Id-Danimarka qed tiffoka l-aktar fuq il-fruntiera tagħha mal-Ġermanja. L-Awstrija qed tiffoka l-aktar fuq il-fruntiera tagħha mal-Islovenja. Il-Ġermanja qed tiffoka fuq il-fruntiera tagħha mal-Awstrija. Franza estendiet il-kontrolli tagħha sas-26 ta’ Frar minħabba li għadha fi stat ta’ emerġenza wara l-attakki terroristiċi f’Novembru li għadda. L-Isvezja qed twettaq kontrolli fuq il-fruntieri kollha tagħha, speċjalment mad-Danimarka. In-Norveġja mhix fil-UE imma tagħmel parti mix-‘Schengen u introduċiet il-kontrolli fuq il-fruntieri kollha tagħha wkoll.

Il-Ministri tal-Intern tal-pajjiżi membri tal-UE (imma l-aktar fost il-membri tax-‘Schengen’) qed jitolbu lil Kummissjoni biex tistudja l-possibilitajiet li l-istati membri jestendu l-perijodu ta’ żmien li fih jistgħu jibqgħu jagħmlu l-kontrolli fuq il-fruntieri tagħhom. Dan għaliex, bir-regoli kif inhuma, il-pajjiżi jistgħu jagħmlu kontrolli għal żmien limitat. Pereżempju, skont ir-regoli tax-‘Schengen’, l-Awstrija u l-Ġermanja huma obbligati jieqfu fix-xahar ta’ Mejju. Dan qed iqajjem tħassib l-aktar jekk l-immigrazzjoni tkun għadha mhux ikkontrollata fil-fruntieri esterni tal-UE.

Allura minn Mejju ’l hemm, l-istati membri se jkunu jistgħu jġeddu l-kontrolli fuq il-fruntieri għal erba’ darbiet, kull darba għal perijodu ta’ 6 xhur sa massimu ta’ sentejn jew sa Mejju tal-2018. Il-Kummissjoni qed tgħid li dawn il-miżuri se jidħlu fis-seħħ biex tkun imħarsa ż-żona ‘Schengen’ u mhux biex din tispiċċa.