ĦIDMA DIPLOMATIKA MAL-ALĠERIJA U MAL-MAROKK 

L-UE kienet f’ħidma diplomatika mal-Alġerija u l-Marokk biex issaħħaħ ir-relazzjonijiet bilaterali maż-żewġ pajjiżi tal-Magreb. Fit-13 ta’ Marzu se jiġi addottat dokument dwar il-prijoritajiet tas-sħubija strateġika bejn l-Alġerija u l-UE.  L-UE ikkonkludiet il-proċess għall-iffirmar tal-ftehim ta’ assoċjazzjoni mal-Alġerija. Id-dokument jittratta bosta aspetti li jvarjaw minn governanza tajba, demokrazija u l-moviment ħieles taċ-ċittadini għal kooperazzjoni fil-qasam tal-enerġija u tas-sigurta`. Il-ħsieb hu li r-riformi politiċi u ekonomiċi jsiru permezz tad-diversifikazzjoni tal-ekonomija.  Iż-żewġ naħat iddiskutew l-isfidi reġjonali li jinkludu s-sigurta`, il-prevenzjoni u l-ġlieda kontra t-terroriżmu u l-immigrazzjoni, inkluż mil-Libja, il-Mali u l-Magreb. Federica Mogherini iddeskriviet il-ftehim bħala ‘żvilupp inkoraġġanti’.

Intant il-Kummissarju Ewropew Karmenu Vella kien Agadir, il-Marokk biex jenfasizza l-importanza ta’ relazzjonijiet bilaterali mal-UE. Vella tkellem dwar l-istatus tas-Saħara tal-Punent u stieden il-Ministru Marokkin għall-Biedja u s-Sajd għall-Konferenza Ewro-Mediterranja li se ssir f’Malta fid-29 ta’ Marzu.