IĊ-ĊINA U l-INDJA B’OĠĠETTI U MEDIĊINI FOLOZ

Iċ-Ċina tibqa’ l-aktar pajjiż li tħasseb l-Ewropa fil-qasam tal-piraterija u falsifikazzjoni, filwaqt li l-Indja tħasseb l-aktar għal qasam tal-mediċini, qalet il-Kummissjoni Ewropea fl-aħħar rapport tagħha dwar il-protezzjoni u l-infurzar tad-drittijiet tal-proprjeta` intellettwali f’pajjiżi terzi.

Mill-oġġetti kollha foloz li daħlu u li nqabdu fl-Unjoni Ewropea, 80% minnhom kienu ġejjin miċ-Ċina u Hong Kong. Il-Kummissjoni qalet li l-Unjoni għandha tagħmel sforz akbar biex tipproteġi l-kummerċ u l-konsumaturi minn oġġetti foloz u mill-piraterija.

L-Indja hija l-ikbar produttriċi tal-farmaċewtika falza u hija ta’ tħassib minħabba n-nuqqas ta’ protezzjoni adegwata għal dawn il-prodotti.

Il-Kummissjoni qalet li l-Indonesja, ir-Russja, u l-Arġentina japplikaw kriterji ristrettivi eċċessivi li jxekklu l-innovazzjoni, r-riċerka u anki l-investiment. Il-Kummissjoni kkritikat ukoll lil Brażil għal fatt li mhux konformi mal-istandards internazzjonali.

Ir-rapport tal-Kummissjoni jgħid li r-riċerka turi li qed jiżdiedu n-numru ta’ konsenji żgħar, b’servizzi postali, ta’ oġġetti foloz filwaqt li r-rotot tal-kummerċ ta’ oġġetti foloz qed isiru aktar kumplessi.

Ir-rapport juri wkoll li s-sistema ta ‘protezzjoni tal-UE għall-indikazzjonijiet ġeografiċi hija wkoll soġġetta għal abbuż f’pajjiżi terzi, li twassal għal telf ekonomiku sinifikanti għall-produtturi tal-UE ta’ prodotti agroalimentari distinti.