ID-DEĊIŻJONIJIET EWROPEJ LI JAFFETTWAW LIL PAJJIŻNA

Huwa importanti li l-poplu jifhem id-deċiżjonijiet li jittieħdu fuq livell Ewropew u li jaffettwaw lil Malta. L-Unjoni Ewropea qed taffaċċja numru ta’ kriżijiet li dwarhom se jittieħdu deċiżjonijiet li se jaffettwaw lil pajjiżna. Il-problema hi li ħafna nies għadhom mhux konxji ta’ dak li jkun qed jiġri Brussell u jsiru jafu dwar ċertu deċiżjonijiet meta jkunu diġa` ttieħdu u waslu fil-fażi tal-implimentazzjoni f’pajjiżna. Dan qalu Alfred Sant waqt it-tnedija uffiċċjali ta’ din in-newsletter.

 “Qed nistennew tibdiliet u żviluppi ġodda fl-oqsma tat-tassazzjoni, l-immigrazzjoni, it-tmexxija taż-żona ewro, is-servizzi finanzjarji u l-ambjent fost oħrajn. Nemmen li għan ewlieni ta’ Membru Parlamentari Ewropew huwa li jżid l-għarfien dwar kwistjonijiet li jinqalgħu mhux biss fuq livell ta’ Parlament Ewropew iżda anki fuq livell tal-pajjiżi kollha tal-Unjoni Ewropea”.

 Din in-newsletter hija maħsuba biex tgħarraf lill-pubbliku Malti u Għawdxi dwar kwistjonijiet qabel ma tkun ittieħdet deċiżjoni dwarhom. “Ħafna nies b’mod naturali jiffukaw fuq il-politika lokali u l-attivitajiet ekonomiċi. Qajla jagħtu l-attenzjoni lejn il-perspettiva Ewropea. L-opinjoni pubblika trid tibqa’ konxja tal-kwistjonijiet li huma kurrenti u ta’ dawk li qed iqumu fuq livell Ewropew u li jaffettwaw lill-poplu Malti u Għawdxi.” saħaq Dr Sant.