ID-DIVING RIŻORS GĦAL GĦAWDEX DAQS IT-TEMPJI

Is-settur tad-diving għal Għawdex huwa riżors importanti daqs iċ-Ċittadella u t-Tempji Megalitiċi, qal l-ex Prim Ministru Alfred Sant meta żar ix-Xatt l-Aħmar f’Għawdex – wieħed mill-iktar imkejjen popolari fost dawk entużjasti tad-diving u l-esplorazzjoni tal-vapuri mgħerrqa.  L-industrija ta’ din in-niċċa importanti tat-turiżmu f’Għawdex hemm bżonn tibqa’ innovattiva u sostenibbli u protetta  daqs  l-attrazzjonijiet kulturali u storiċi ta’ Għawdex. Id-diving jattira 20% tat-total tat-turisti li jżuru lil Għawdex is-sena kollha.

Dr Sant ġie aġġornat dwar l-isfidi li qed taffaċċja din l-industrija tant importanti għal Għawdex minn Mark Busuttil – pijunier tas-settur tad-diving u wieħed mill-operaturi ewlenin f’Għawdex. Minkejja l-kompetizzjoni ħarxa li joffru destinazzjonijiet fil-Baħar l-Aħmar, Għawdex xorta Għawdex jattira mijiet ta’ għaddasa mill-Ewropa kollha.

Is-Sur Busuttil qal li aktar vapuri mgħerrqa f’Għawdex inaqqas l-impatt u l-fluss ta’ għaddasa fuq siti naturali li huma ambjentalment aktar sensittivi u jgħinu wkoll biex jistimulaw l-industrija tad-diving.

Il-fdalijiet imxerrdin f’Xatt l-Aħmar fl-2006 biddlu s-sit minn wieħed li ma tantx kien jintuża għat-tieni l-aktar sit frekwentat minn l-għaddasa wara d-Dwejra.

L-UE tikkonsidra din il-prassi bħala ‘rimi fil-baħar’ u qed tostakola l-implimentazzjoni tagħha.