IKLA GĦALL-VISEGRAD QABEL IS-SUMMIT

L-erba’ mexxejja tal-pajjiżi tal-Visegrad – Polonja, Ungerija, Repubblika Ċeka u Slovakkja – kienu mistiedna għall-ikel fi Brussell, eżatt qabel is-summit Ewropew. Juncker għamel din l-istedina biex jipprova jnaqqas it-tensjoni u jżid id-djalogu ma’ dawn il-pajjiżi. Juncker qed jaħdem għall-għaqda bejn is-27 pajjiż tal-UE fi żmien meta qed ikun negozjat il-Brexit u fi żmien meta l-UE jeħtieġ tissaħħaħ aktar. Il-pajjiżi tal-Visegrad ma jaqblux f’diversi oqsma mal-politika tal-Kummissjoni, speċjalment fil-qasam tal-immigrazzjoni tant li kemm-il darba esprimew fil-miftuħ in-nuqqas ta’ qbil u d-diżappunt tagħhom. L-Ungerija, il-Polonja u r-Repubblika Ċeka jistgħu jittellgħu quddiem il-Qorti Ewropea tal-Ġustizzja għax ma rrispettawx is-sistema ta’ kwoti ta’ immigranti li qed timponi l-Kummissjoni Ewropea.