IL-BANK ĊENTRALI EWROPEW MA JĊAĊLAQ XEJN

Fl-ewwel deċiżjoni tiegħu wara l-Brexit, il-Bank Ċentrali Ewropew iddeċieda li ma jmissx ir-rati ta’ interessi u għajnuniet finanzjarji oħra u jħalli kollox kif inhu. Mario Draghi qal li għalissa għadu kmieni biex wieħed jara l-impatt ekonomiku li ħalla l-vot Brittanniku.  Qal ukoll li sa issa ma kienx hemm problemi kbar fis-swieq finanzjarji u fis-settur bankarju. Dan għaliex il-banek ċentrali kellhom biżżejjed likwidita`.

Din id-deċiżjoni kienet mistennija. Il-Bank Ċentrali Ewropew se jistenna qabel ma jżid l-istimoli ekonomiċi li jagħtu spinta lill-inflazzjoni. “Fix-xhur li ġejjin, meta jkollna aktar informazzjoni, inkunu f’pożizzjoni aħjar biex naraw fejn mixjin il-kundizzjonijiet ekonomiċi, liema toroq iwasslu għal aktar inflazzjoni u tkabbir u r-riskji li jkun hemm imdawrin magħhom,” qal Mario Draghi. Żied jgħid ukoll li, “L-effett tal-Brexit jista’ jkollu impatt ta’ bejn 0.2% u 0.5% fuq it-tkabbir taż-żona ewro fuq perijodu ta’ tliet snin.” Iżda wissa li dawn iċ-ċifri għandhom jittieħdu b’mod kawt għax kollox għadu fl-inċertezza. Il-Bank Ċentrali Ewropew lest li juża l-istrumenti finanzjarji kollha li huma possibbli biex jilħaq il-miri tiegħu.