IL-BELARUS IĦARES LEJN IL-PUNENT

Il-Belarus trid relazzjonijiet aktar mill-qrib mal-Punent anki jekk dan xejn m’hu jinżel tajjeb mal-alleat tradizzjonali tagħha r-Russja. Belarus kellha nuqqas ta’ qbil ma’ Moska, li ħabbret li se tqasqas is-sussidji li żammew lil dan il-pajjiż ta’ 9.5 miljun ruħ taħt l-influwenza Russa.

Il-President tal-Belarus Alexander Lukashenko kellu sensiela ta’ laqgħat mal-President Russu Vladimir Putin. Jidher li ma rawx għajn ma’ għajn dwar il-futur. Ir-Russja qed tipproponi  bdil fit-taxxa Russa li l-Belarus qed tgħid li se tiswiha $400 miljun dollaru fis-sena.

Lukashenko bidel it-ton meta tkellem dwar in-NATO u l-UE.

“Irridu nkellmuhom, ma rridux inħarsu lejhom daqs li kieku għedewwa. Idealment il-Lvant u l-Punent isibu bilanċ fil-politika barranija”.

L-istqarrija ta’ Lukasenko xejn ma’ niżżlet tajjeb mar-Russja.

Lukashenko ilu fit-tmun tal-Belarus għal dawn l-aħħar 25 sena. F’dawn is-snin żamm allineament mar-Russja ħafna aktar minn stati oħra ex-Sovjetiċi. Iżda mill-2014 lil hawn beda juri sinjali ta’ ġibda lejn l-Istati Uniti u l-UE, meta l-Belarus ma rrikonoxxiex l-għaqda tal-Krimea mir-Russja.