IL-FONDI GĦALL-IŻVILUPP REĠJONALI

L-Unjoni Ewropea għandha fondi li jiffinanzjaw proġetti għall-iżvilupp u t-titjib fir-reġjuni differenti tagħha. Dawn jissejħu fondi għall-iżvilupp reġjonali u jistgħu jintużaw għal diversi għanijiet f’oqsma differenti. Fost oħrajn, jistgħu jintużaw biex isir restawr ta’ bini storiku, biex issir ir-riċerka u anki biex isir investiment fl-edukazzjoni. Il-fondi reġjonali għandhom l-għan ukoll li jħajru l-investiment ta’ negozji żgħar u medji.

F’dawn l-aħħar snin permezz ta’ dawn il-fondi f’Malta sar il-proġett taċ-ċentru nazzjonali tax-xjenza f’Bighi bl-għan li aktar studenti Maltin jagħżlu l-qasam tax-xjenza u r-riċerka. Il-fondi reġjonali għenu lill-intrapriżi żgħar u medji b’żewġ modi – bi ‘grants’ li kienet qed tagħti l-Malta Enterprise, kif ukoll bi programm magħruf bħala JEREMIE li jgħin lill-intrapriżi żgħar ikollhom aċċess aktar faċli għall-kapital f’kas li jkunu jridu jkabbru, jimmodernizzaw u jiddiversifikaw l-attivitajiet tagħhom. F’Malta l-fondi reġjonali ntefqu wkoll fir-restawr tal-fortifikazzjonijiet storiċi bħal Forti Sant’Anġlu. Intefqu fil-qasam tal-enerġija alternattiva permezz tal-iskema tad-domestic PV panels fejn dawk li investew fil-pannelli fotovoltajċi ngħataw rebate. Saru wkoll proġetti fil-qasam tas-saħħa u tal-edukazzjoni permezz ta’ dawn il-fondi, fosthom il-proġett tal-onkoloġija u l-proġett tal-bini tal-MCAST.

Fis-snin li ġejjin, il-fondi reġjonali f’Malta se jintefqu fir-riċerka, l-iżvilupp teknoloġiku u l-innovazzjoni;  it-teknoloġija tal-informatika, investiment lin-negozji żgħar u medji;  miżuri biex jitnaqqsu l-gassijiet tossiċi; il-ħarsien tal-ambjent; żvilupp urban sostenibbli; settur tat-trasport b’livell aktar baxx ta’ emissjonijiet; soċjeta’ aktar inklussiva u fil-qasam tat-taħriġ u t-tagħlim tul il-ħajja.