IL-FTEHIM BEJN IT-TURKIJA U L-UE: KEMM SE JKUN EFFETTIV?

L-UE se tibda tibgħat lura lit-Turkija l-immigranti li jaslu fuq ix-xtut tagħha. Għal kull immigrant li jintbagħat lura, se tieħu immigrant Sirjan li jkun applika għall-ażil b’mod regolari. Dan il-mekkaniżmu huwa volontarju u temporanju. Se jibqa’ jsir sakemm l-immigranti jieqfu jaqsmu l-baħar Eġew u jirfsu x-xtut Griegi illegalment u sakemm jintlaħaq limitu ta’ 72, 000 refuġjat. Jekk tinqabeż din iċ-ċifra jkun ifisser li l-pjan ma rnexxiex. Dan il-ftehim qed iqanqal bosta reazzjonijiet differenti. Min se jingħata ċ-ċans imur l-Ewropa u min se jibqa’ t-Turkija? Kif se jintagħżlu l-immigranti? Min se jagħżilhom?

Bis-saħħa ta’ dan il-ftehim it-Turkija serrħet rasha dwar il-liberalizzazzjoni tal-Visa għaċ-ċittadini tagħha li jridu jidħlu fl-Ewropa, sakemm iżżomm mal-obbligi tagħha. Rigward il-finanzjament, it-€3 biljuni se jingħataw malajr kemm jista’ jkun għall-finanzjament ta’ proġetti tas-saħħa, edukazzjoni u infrastruttura li mistennija li jibdew sa minn April li ġej. It-Turkija se tirċievi €3 biljun addizzjonali oħra fl-2018, meta l-ewwel €3 biljuni jkunu ntefqu kif sippost. Il-Prim Ministru Tork Davutoglu qal li n-numru ta’ 72, 000 huwa biss in-numru tal-ewwel skambju – il-kwota tal-bidu.

Il-ftehim qed isir bit-tama li t-traffikanti tan-nies ma jibqax ikollhom attivita`.

Il-President tal-Kummissjoni Ewropea bagħat 4,000 espert fil-Greċja fejn se titħaddem is-sistema tar-ritorn. L-esperti jinkludu imħallfin, interpreti u għassiesa tal-kosta. Ir-ritorn tal-immigranti mistenni li se jiswa bejn €380 u €400 miljun ewro. Franza qalet li lesta tagħti 200 uffiċċjal Franċiż oħra lil Frontex u 100 persuna oħra lill-aġenzija tal-ażil. Il-Kanċilliera Germaniża Angela Merkel qalet li l-Ewropa se tirnexxi f’dan l-att ta’ koperazzjoni mat-Turkija. Qalet li l-messaġġ huwa ċar – dawk li jaqsmu b’mod illegali mhux biss qed jirriskjaw ħajjithom imma mhux se jirnexxielhom jibqgħu fl-Ewropa.

Mill-bidu tas-sena ’l hawn walsu l-Greċja mill-anqas 144,000 persuna, l-aktar Sirjani, Iraqqini u Afgani. Ftit biss minn dawn riedu jibqgħu fuq territorju Grieg. Il-pjan tagħhom huwa li jilħqu t-tramuntana tal-Ewropa. L-għeluq tal-fruntieri tal-Balkani fissret li tal-inqas 48,000 persuna sfaw blukkati fil-Greċja. 12,000 persuna oħra qegħdin fit-tined mal-fruntiera tal-Maċedonja, jisperaw li xi darba jirnexxielhom jaqsmu.

Malta u l-Italja huma mħassba li mal-għeluq tar-rotta tal-baħar Eġew, il-problema tersaq għal Mediterran. Ir-Rappreżentanta Għolja tal-Affarijiet Barranin tal-UE Federica Mogherini qalet li hemm madwar 450,000 persuna fil-Libja li jistgħu jfittxu t-triq tal-immigrazzjoni illegali lejn l-Ewropa. Għalhekk Mogherini qed tfittex li tappoġġja Gvern Nazzjonali Libjan li għad irid ikun approvat mill-parlament Libjan. Huwa biss permezz tal-istabilita` li l-Libja tiġġieled it-terroriżmu u tikkontrolla l-immigrazzjoni.

F’laqgħa bejn il-Prim Ministri ta’ Malta, l-Italja, Franza u r-Renju Unit ġiet diskussa  l-problema tal-Libja. Imma l-mistoqsija toħroġ waħidha; jekk ma jintlaħaqx qbil dwar min se jkun il-gvern fil-Libja, il-ftehim ma’ min se jsir? Naraw se jiġri fil-Mediterran fix-xhur li ġejjin.