IL-ĠERMANJA TRID TIBGĦAT IMMIGRANTI LURA L-GREĊJA U L-ITALJA

Il-Ġermanja trid tinnegozja mal-Italja u l-Greċja biex jinbagħtu lura l-immigranti li għamlu talba tal-ażil f’dawn iż-żewġ pajjiżi.

“Dawk li applikaw għall-ażil fl-Italja u l-Greċja u li jinqabdu fil-fruntiera bejn il-Ġermanja u l-Awstrija se jintbagħtu f’ċentri ta’ transitu biex jittieħdu lura f’Ruma u Ateni,” qal Il-Ministru tal-Intern Ġermaniż Horst Seehofer li qed jistenna negozjati “diffiċli” mal-Italja u l-Greċja.

Seehofer qal li jekk dawn id-diskussjonijiet ma jirnexxux, it-tliet stati membri jeħtieġu miżuri ġodda kontra l-immigrazzjoni illegali. Dawk l-immigranti li ma għamlux talba għal ażil u baqgħu sejrin lejn l-Ewropa ta’ fuq mhux se jintlaqtu minn dawn id-deċiżjonijiet.

Seehofer imexxi l-Partit Ġermaniż CSU tal-Bavarja, li hu partit sħab u tal-istess familja tal-Kanċilliera Angela Merkel.  Dan l-aħħar qed jagħfas lil Kanċilliera Ġermaniża dwar l-immigrazzjoni.

Il-Kanċillier tal-Awstrija Sebastian Kurz jaqbel ma’ Seehofer. L-Awstrija mhux se tintlaqat u mhux se jingħalqu fruntieri fin-naħa t’isfel ta’ dan il-pajjiż li setgħu jaffettwaw il-moviment ħieles taż-żona Schengen.

Il-Prim Ministru tal-Ungerija, Victor Orbán qal li pajjiżu mhux se jħalli immigranti jidħlu fit-territorju Ungeriż. Seehofer qal li l-Ġermanja mhux se tibgħat immigranti lejn l-Ungerija għax aktarx li dawn l-immigranti jkunu trasferiti lejn il-Greċja fejn għamlu t-talba tal-ażil.

Ma ħarġet ebda statistika uffiċċjali dwar in-numru ta’ immigranti li se jkunu trasferiti.

Id-diskussjonijiet informali bejn il-Ministri tal-Intern se jitkomplew f’Innsbruck fi tmiem din il-ġimgħa. Iżda l-Ministru tal-Intern Taljan Matteo Salvini diġa`  għamilha ċara li mhux se jieħu immigranti, la mill-Ġermanja u l-anqas mill-Awstrija.