IL-ĠERMANJA U L-AWSTRIJA JESTENDU L-KONTROLLI FUQ IL-FRUNTIERI

Il-Ġermanja u l-Awstrija talbu estensjoni ta’ sitt xhur oħra għat-tkomplija tal-kontrolli fuq il-fruntieri tagħhom.  Fit-12 ta’ Mejju  il-Ġermanja, l-Awstrija, L-Isvezja, id-Danimarka u n-Norveġja – kollha stati tax-Schengen – kisbu l-permess tal-Kummissjoni biex iwettqu kontrolli fuq il-fruntieri tagħhom minħabba d-dħul ta’ immigranti illegali, anki wara li ngħalqet ir-rotta tal-Balkani. Skont il-kodiċi tat-tmexxija tax-Schengen,  dawn il-kontrolli kellhom isiru għal żmien sitt xhur. Il-Kummissjoni qalet li dan il-permess ingħata minħabba s-sitwazzjoni fil-Greċja. Issa l-perijodu ta’ sitt xhur jispiċċa f’Novembru.

Il-Ministru tal-Intern Awstrijakk Wolfgang Sobotka qal li hemm 50, 000 immigrant fil-Greċja u aktar immigranti fil-Balkani. Għalhekk jemmen li hemm bżonn kontrolli fuq il-fruntieri, inkella pajjiżu jieħu miżuri oħra.

Il-Kummissjoni qalet li ma ntlaħqux il-kondizzjonijiet kollha biex ix-Schengen taħdem b’mod normali. Għalhekk mistennija li tiġġustifika u taċċetta dawn il-kontrolli. Dan minkejja li Franza tixtieq normalizzazzjoni tas-sistema tax-Schengen u s-Slovenja qed tikkritika dawn it-tip ta’ miżuri.