IL-KE TRID ISSAĦĦAĦ IŻ-ŻONA EWRO

Il-Kummissarju tal-Ekonomija u l-Finanzi Pierre Moscovici ippreżenta l-isfidi li se taffaċċja ż-żona ewro fix-xhur li ġejjin. Moscovici esprima ruħu b’mod pożittiv dwar il-qagħda taż-żona ewro u saħaq li t-tkabbir għal din is-sena jista’ jaqbeż it-2%.  Tkellem b’mod pożittiv ukoll dwar il-kuntesti politiċi Ewropej fejn il-partiti hekk imsejħa populisti qal li ġarrbu ħafna telfiet f’dawn l-aħħar xhur.

Kif tenna l-President tal-Kummissjoni Ewropea Jean Claude Juncker, Moscovici qal li din is-sitwazzjoni favorevoli tiftaħ ħafna opportunitajiet biex tissaħħaħ iż-żona ewro. Il-Kummissarju Moscovici qal li hija l-vokazzjoni tal-istati membri kollha tal-Unjoni Ewropea li jaddottaw l-ewro. Qal ukoll li l-konverġenza fi ħdan iż-żona ewro hija bżonnjuża.

Il-Kummissarju saħaq li ż-żona ewro għandu jkollha l-baġit tagħha kif ukoll Ministru tal-Finanzi u tal-Ekonomija. Għalkemm dawn ir-riformi mhux se jsiru mil-lum għall-għada, Moscovici esprima x-xewqa li d-diskussjoni u l-pjanijiet ikomplu fix-xhur li ġejjin