IL-PAJJIŻI AFRIKANI MA JRIDUX IMMIGRANTI F’PAJJIŻHOM

Tliet ġimgħat biss qabel il-konferenza li se ssir il-Belt Valletta dwar il-kriżi tal-immigrazzjoni, diġa` qed joħorġu xi punti ta’ tilwim.

Skont rapport li għamel il-Lussemburgu matul il-Presidenza tiegħu, instab li l-pajjiżi Afrikani mhux entużjasti li jkollhom ċentri f’pajjiżhom għal nies li qed jitolbu l-ażil u li potenzjalment jixtiequ jidħlu fl-UE. Dawn iċ-ċentri joħolqu biża’ lill-pajjiżi Afrikani. Il-Kummissarju Għoli tal-Ġnus Magħquda (UNHCR) ukoll ma jaqbilx mat-twaqqif ta’ dawn iċ-ċentri. Qed jintqal li jeħtieġ li jkun spjegat x’se jkun ir-rwol ewlieni taċ-ċentri. Dan għaliex il-pajjiżi Afrikani qed jibżgħu li dawn iċ-ċentri se jservu biex l-Unjoni Ewropea titfa’ fuq xtut oħra r-responsabbiltajiet tat-talbiet tal-ażil. L-inkwiet hu li dawn iċ-ċentri bil-kampijiet jibqgħu hemm b’mod permanenti u jtaqqlu is-sistema ta’ ażil tal-pajjiżi tal-Afrika.

Fil-Konferenza li se ssir f’Malta, it-28 pajjiż mistennija jaqblu fuq pjan ta’ azzjoni mal-pajjiżi Afrikani. Il-pjan se jiffoka dwar l-għajnuna finanzjarja tal-UE u dwar programmi ta’ immigrazzjoni legali biex dan il-fenomenu jkun ikkontrollat. Il-pajjiżi Afrikani li jikkooperaw mal-UE jistgħu jibbenefikaw minn ħruġ malajr ta’ visas u jkun aktar faċli għal studenti Afrikani biex jieħdu sehem fi programmi bħal Erasmus+.

Aktar mal-pajjiżi Afrikani jikkooperaw, aktar jieħdu flus – politika li mhux qed tinżel sew mal-pajjiżi Afrikani speċjalment f’dak li għandu x’jaqsam mal-immigrazzjoni legali u ftehim ieħor dwar ir-ritorn tal-immigranti lura lejn l-art li telqu minnha. Jidher li għadu ma ntlaħaqx qbil bejn il-pajjiżi Ewropej u dawk Afrikani.