IL-PASSAT RIĊENTI VITALI GĦALL-FUTUR

Il-Kap tad-delegazzjoni Maltija Laburista fil-Parlament Ewropew Dr Alfred Sant qal li d-deċiżjonijiet fuq il-futur tal-Ewropa għandhom ikunu msejsa fuq analiżi kritika u onesta tal-passat riċenti tal-Ewropa. Sfortunatament dan l-eżerċizzju qed jitħalla f’idejn il-populisti u d-demagogi. Dan qalu Alfred Sant fil-Parlament Ewropew fid-dibattitu “Il-‘White Paper’ dwar il-futur tal-Unjoni Ewropea”.

Dr Sant qal li l-Ewropa teħtieġ tagħraf u teżamina n-nuqqasijiet tagħha kif ukoll il-kisbiet tal-proġett Ewropew ta’ dawn l-aħħar sittin sena – jiġifieri l-azzjonijiet strateġiċi tagħha meħuda f’perjodu storiku partikolari. Jekk dawn kienu tajbin għal popli Ewropej mela jridu jingħataw aktar saħħa, fejn kienu ħżiena għandhom jitreġġgħu lura.

“Jeħtieġ niddiskutu l-passat tal-Ewropa fil-qafas storiku. Ħafna drabi nħoss, li f’dan il-Parlament u f’postijiet oħra, diskussjonijiet ta’ dan it-tip jissarrfu esklussivament f’perspettiva ideoloġika. Forsi għandna bżonn nirrevedu b’mod storiku u kritiku x’sarraf il-Proġett Ewropew fil-qafas tar-realtajiet storiċi Ewropej li seħħew mir-Rivoluzzjoni Franċiża ’l hawn.” qal Dr Sant.

L-għan tal-‘White Paper’ huwa li tidentifika l-isfidi u l-opportunitajiet  quddiem l-Ewropa u l-futur tas-27 stat membru flimkien. Tipproponi 5 xenarji dwar l-iżvilupp tal-UE sas-sena 2025.