IL-POLONJA TBIGĦ LAĦAM TA’ BAQAR MORDA

Il-Kummissjoni Ewropea se tibgħat spetturi fil-Polonja wara li ġurnalisti televiżivi Pollakki kellhom filmati ta’ baqar morda jinqatlu għall-ikel fil-biċċeriji Pollakki.

Il-Polonja esportat madwar tliet tunnellati ta’ ċanga minn baqar maqtula illegalment lil għaxar pajjiżi tal-UE. Il-Polonja qed tirtira ċ-ċanga mis-suq wara li l-awtoritajiet irnexxielhom isibu fejn inxtara dan il-laħam fl-Estonja, Finlandja, Franza, Ungerija, Litwanja, Portugall, Rumanija, Slovakkja, Spanja u Svezja.

Madwar seba’ tunnellati oħra ta’ baqar maqtula illegalment ġew mibjugħa f’madwar għoxrin ħanut fil-Polonja.

Issa nfetħet inkjesta kriminali filwaqt li l-Kummissarju tal-UE għal-ikel qal li tim ta’ spetturi minn Brussell sejrin il-Polonja biex jagħmlu l-ispezzjonijiet.

Il-Polonja qalet li dan kien każ iżolat u li se jkun hemm kameras erbgħa u għoxrin siegħa kuljum fil-biċċeriji filwaqt li se jiżdiedu l-ispezzjonijiet fil-biċċeriji tal-pajjiż. Il-Polonja mistennija tonfoq €23.1 miljun biex jidħlu fis-seħħ dawn it-tibdiliet.

Il-Polonja tipproduċi 560, 000 tunnellata ta’ ċanga fis-sena.