IMĠEDDED IL-PJAN TA’ SALVATAĠĠ FIL-MEDITERRAN

L-UE ġeddet il-programm tal-operazzjonijiet ta’ salvataġġ fil-Mediterran sa Diċembru tal-2018. L-għan ta’ dan il-programm huwa li taqbad lit-traffikanti tal-persuni u tħarbtilhom il-mudell kummerċjali tagħhom fiċ-ċentru tal-Mediterran. Il-programm se jibda wkoll jgħasses u jiġbor l-informazzjoni dwar it-traffikar u l-esportazzjoni illeċita taż-żejt Libjan. Fil-passat diġa` għen fl-implimentazzjoni tal-embargo tal-Ġnus Magħquda tal-armi f’ibħra internazzjonali lil hinn mill-kosta Libjana.

L-UE trid aktar bdil ta’ informazzjoni bejn aġenziji oħra bħal Frontex u l-Europol dwar it-traffikar tal-persuni.  L-UE ħabbret li se timplimenta mekkaniżmu ta’ monitoraġġ permezz tal-gwardji tal-kosta Libjani li diġa` ngħataw taħriġ fil-qasam. Ħafna organizzazzjonijiet ikkritikaw lil gwardji tal-kosta Libjani li jimbottaw lill-immigranti lura fl-ibħra.

“Daqt nirrevedu l-pjan tagħna biex jinkludi attivitajiet ġodda bħall-monitoraġġ tal-gwardji tal-kosta Libjani” qalet ir-Rappreżentanta Għolja tal-Affarijiet Barranin tal-UE Federica Mogherini.

It-tiġdid ta’ dan il-pjan ta’ salvataġġ wasal wara li l-Italja wriet ir-riżervi tagħha għall-fatt li l-istati membri l-oħra mhux qed juru solidarjeta` dwar l-immigrazzjoni. L-Italja insistiet għal bdil fir-regoli tal-iżbark tal-immigranti għax persuni salvati permezz ta’ dan il-programm kollha qed jitniżżlu l-Italja. 

L-Italja ma rnexxilhiex twettaq it-tibdil meħtieġ. Bħalissa l-awtoritajiet Taljani qed jaħdmu mal-Kummissjoni Ewropea biex jitfassal kodiċi ta’ etika li l-organizzazzjonijiet umanitarji fiċ-ċentru tal-Mediterran qed iqisu bħala kontroversjali.