IR-RENJU UNIT IFITTEX OPPORTUNITAJIET ĠODDA

Wara li jitlaq mill-UE, ir-Renju Unit se joħloq pjan biex jibqa’ wieħed mill-aqwa pajjiżi għall-kummerċ madwar id-dinja, qalet il-Prim Ministru Ingliża Theresa May.

May qalet lil kabinett tagħha li r-Renju Unit se jfittex li jikkontrolla n-numru ta’ nies li jemigraw f’pajjiżha mill-Ewropa iżda wkoll se jfittex triq pożittiva għal dawk li jagħmlu l-kummerċ ta’ oġġetti u servizzi.

Fost il-ministri ħadd ma jaf preċiż liema forma se jkollu l-Brexit. Hemm nuqqas ta’ qbil dwar il-bilanċ bejn l-aċċess għas-suq ħieles u l-kontroll tal-immigrazzjoni li bħalissa kważi laħaq livelli rekord. Kull ministru ntalab jagħti l-prijoritajiet fin-negozjati u l-opportunitajiet li jista’ joffri l-Brexit fl-oqsma differenti tagħhom.

Theresa May beħsiebha tinvoka Artiklu 50 (il-mekkaniżmu formali li bih jibda l-perijodu ta’ negozjati u li jdum sa massimu ta’ sentejn) fil-bidu tas-sena l-ġdida mingħajr vot fil-parlament. May żgur mhux se ssejjaħ it-tieni referendum u se tibqa’ għaddejja biex ir-Renju Unit joħroġ mill-UE.

Fix-xhur tas-Sajf sar ħafna xogħol biex il-pajjiż iħejji ruħu għan-negozjati tat-tluq mill-UE. Ir-Renju Unit qed iħares lejn l-opportunitajiet li issa huma miftuħa għalih u li bihom ikollu rwol ġdid fuq livell dinji. In-negozjati se jkollhom l-għan li jiksbu l-aħjar ftehim għal poplu Brittanniku u l-aħjar ftehim għar-Renju Unit fuq livell internazzjonali. Il-kabinett iddiskuta wkoll kif il-Brexit għandu jaħdem għall-Iskozja u għal Wales.

Membri għolja taċ-Ċivil intalbu jaħsbu f’possibilitajiet differenti bejn l-idea ta’ aċċess sħiħ għas-suq ħieles u restrizzjonijiet limitati fil-qasam tal-immigrazzjoni – din il-possibilita` qed tissejjaħ ‘soft brexit’ – u l-idea ta’ ‘hard Brexit’ li tfisser li jidħlu kontrolli iebsa fuq il-fruntieri, tariffi fuq il-kummerċ u anki visas għaċ-ċittadini Ewropej li jridu jmorru vaganza fir-Renju Unit.

Kollox għadu miftuħ għad-diskussjoni, iżda hemm qbil li l-aċċess tas-suq ħieles, speċjalment għal industrija Ingliża tas-servizzi finanzjarji għandha tieħu prijorita` fin-negozjati.

Il-mexxejja Ewropej ilhom jistqarru li jkun hemm aċċess għas-suq ħieles jekk ikun hemm iċ-ċaqliq ħieles tal-ħaddiema kif ukoll il-kontribuzzjonijiet finanzjarji fil-baġit Ewropew. Il-maġġoranza tal-poplu Brittanniku vvota favur il-Brexit l-aktar minħabba l-imigrazzjoni u l-kontribuzzjoni ta’ pajjiżhom fil-baġit Ewropew. Meta jibdew in-negozjati, żgur se jkun hemm tensjoni kbira dwar dawn l-oqsma. L-UE ma tistax tidher ġeneruża wisq mar-Renju Unit għax ma tkunx trid tqanqal ix-xewqa li aktar pajjiżi jitħajru joħorġu mill-UE.