IR-RENJU UNIT MA KIENX LEST GĦAL BREXIT

Il-President tal-Kummissjoni Ewropea Jean-Claude Juncker qal li r-Renju Unit jeħtieġ xhur ta’ preparazzjoni qabel jiftaħ id-diskussjonijiet għall-ħruġ tal-pajjiż mill-UE. Ma hemmx data fissa għat-tnedija tad-diskussjonijiet għax huwa l-pajjiż stess li jattiva artiklu 50 tat-trattati. Juncker ikkritika lill-pajjiż li ma ppreparax aħjar għal possibilita` li jitlaq mill-UE u qal li kien jippreferi kieku d-diskussjonijiet jibdew mill-aktar fis. “Kont nippreferi kieku ir-Renju Unit ippreżenta l-ittra ta’ riżenja tiegħu malajr kemm jista’ jkun. Ħsibt li l-Brittanniċi, speċjalment dawk li riedu joħorġu mill-UE, ippreparaw għal din il-possibilita`,” qal Juncker.

Għall-ewwel Juncker ipprova jitfa’ pressjoni fuq ir-Renju Unit biex jattiva artiklu 50 malajr u jibda l-proċess ta’ ħruġ. F’sessjoni ta’ emerġenza li seħħet ġimgħa wara l-vot Ingliż, Juncker ħeġġeġ biex il-pajjiż jiċċara l-futur tiegħu. “Irrid li r-Renju Unit jiċċara l-pożizzjoni tiegħu. Mhux illum, mhux għada fid-9 ta’ filgħodu, imma malajr kemm jista’ jkun,” qal lil Membri tal-Parlament Ewropew fi Brussell u żied jgħid li l-UE ma jistax jibqa’ fi stat twil ta’ inċertezza.

Il-Prim Ministru l-ġdida Theresa May qalet lil Juncker li r-Renju Unit għandu bżonn iż-żmien biex jipprepara għan-negozjati wara r-riżultat tar-referendum.

Juncker ikkonferma li, jekk ir-Renju Unit ma jaċċettax il-moviment ħieles tal-ħaddiema, se jitlef l-aċċess għas-suq ħieles. “Mhux se jkun hemm aċċess għas-suq ħieles għal dawk li ma jaċċettawx ir-regoli – mhux se jkun hemm eċċezzjonijiet – hekk tisħaq in-natura tas-sistema tas-suq ħieles,” qal Juncker. Il-President Franċiż Francois Hollande jaqbel ma’ Juncker u qal li jekk ir-Renju Unit iwaqqaf il-moviment tal-ħaddiema, jitlef l-aċċess għas-suq ħieles.